Үерийн эрсдэлтэй бүсэд байгаа ХУД-ийн 3-р хороонд байрлах "Шунхлай" ШТС-ийг албадан буулгах захирамжийг Нийслэлийн Засаг даргын нэгдүгээр орлогч  Ж.Сандагсүрэн танилцуулж тус ШТС-ийг буулгаж эхэлсэн. Тэгвэл ХУД-ийн 15-р хороонд байрлах "Акуа Гарден" хотхоны барилгыг албадан буулгах захирамжийг танилцуулах үеэр иргэд эсэргүүцлээ илэрхийлсэн юм. 

Нийслэлийн Засаг даргын нэгдүгээр орлогч Ж.Сандагсүрэн "Акуа гарден”-тай холбоотой мэргэжлийн байгууллагын дүгнэлт гарсан. 7844 мкв газарт байрны хоёр блок хамрагдаж байгаа. Мөн адил энэ хэсгийг албадан буулгах дүгнэлт гарсан. Бид гарсан шийдвэрийг хэрэгжүүлэхээр энд ажиллаж байна. Захиалагч нартай маргааш уулзалт зохион байгуулна. Энэ барилгад 500 гаруй хүн захиалга өгсөн гэж ойлгож байна. Ийм их хохирогчтой, ийм өндөр баригдсан барилгыг нурааж байсан явдал Монголд байхгүй. Гэхдээ бид энэ асуудлыг нэг тийш нь шийдвэрлэх ёстой.Иргэдийг нэн тэргүүнд хохиролгүй болгох нь зөв. Хохирлыг төсвөөс шийдэж таарах байх" гэлээ.

Харин тус байранд захиалга өгсөн иргэд, компанийн ажилчид ийнхүү өгүүлэв. 

Захиалагч: 2019 онд энэ барилга баригдаагүй байхад үер болж байсан. Үер болоход энэ барилга ямар ч хамаагүй. Буулгасны дараа үер болох магадлалтай. 

Захиалагч: "Хотын дарга Д.Сумъяабазар энэ барилга асуудалгүй юм билээ хэмээн Ерөнхий сайдад автобусанд явж байхдаа ярьсан. Тэрийг нь үзчихээд энэ байранд захиалга өгсөн. Энэ барилгыг нураагаад бидний хохирлыг барагдууллаа гэхэд мэдээж цаг хугацаа их орно. Эцсийн дүндээ ард түмний нуруун дээр хохирол ирнэ.

“Акуа гарден” хотхон буюу “Эм Эм Жи” компанийн ажилтан: Манай төсөл улс, нийслэл, яамнаас 30 гаруй хуулийн дагуу зөвшөөрөлтэй. Усны хамгаалалтын бүс зөрчсөн гэдэг асуудал бий. Энэ хуулийн заалтаар манай газрын зөвшөөрлийг цуцлаад, шүүхээр орж, “хууль зөрчөөгүй” гэдгийг тогтоосон шүүхийн шийдвэр бий. Усны тухай хуульд онцгой хамгаалалтын бүсийг Байгаль орчны сайд болон Барилга хот байгуулалтын сайдын хамтарсан тогтоолоор журмаар тогтооно гэж заасан. Журмаараа үерийн хамгаалалтын далан бүхий газар онцгой хамгаалалтын газар тогтоохгүй гэж заасан. Одоогоор энэхүү төсөлд 100 орчим тэрбумын хөрөнгө оруулалт орсон. Үүний 70 хувь нь банкны өр болон захиалагчдын мөнгө юм.