Манай улсад анх удаа "Face of Beauty International-2016” олон улсын миссийн тэмцээн зохион байгуулагдаж байгаа билээ.

 Тэгвэл тус тэмцээний нэг чимэг нь  цахим ертөнцөд “амьд барби” хэмээн алдаршсан Украины мисс  Валерия Лукьянова гэдгийг тэмцээний зохион байгуулагчид онцолсон.

“Амьд барби” буюу Валерия Лукьяноваг Монголд ирж миссийн тэмцээн шүүнэ гэхэд иргэдийн дунд хүлээлт үүсч, түүнийг харах хүсэлтэй залуус ч олон байв.  

Гэвч  Валерия  “Монгол  барби”-г гүйцсэнгүй бололтой. Тэрбээр хэд хэдэн үйлдлээрээ үзэгчдийн дургүйцлыг хүргээд амжив.

Тодруулбал, Монголд  жинсэн өмд, хар савхин хүрэмтэй ирэхэд “Хар зах дээр явж байгаа юм уу. Өөрийг нь Монгол ёс заншлаар хадаг сүүтэй хүндэтгэлтэй хүлээж авч байхад хэнэггүй хандлаа” хэмээн дургүйцсэн.

Мөн гоо үзэсгэлэнгээрээ ч тэнцсэнгүй. Тэрбээр тэмцээний гоёлын даашинзтай үзүүлбэрийн шүүлтийн үеэр жүжигчин А.Туяатай хамт зургаа авахуулсан нь цахим ертөнцөд аль хэдийн таржээ.

Уг зургийг харсан хүмүүс цахим ертөнцөд “Жүжигчин А.Туяа жинхэнэ амьд барби байна. Юун  Валерия Лукьянова вэ” хэмээн шуугиж,   хэлэлцүүлэг хүртэл өрнөөд амжсан.

Цахим ертөнц дэх залуусийн хэлэлцүүлэг нь А.Туяагаас хальж, “Eagle” телевизийн сэтгүүлч асан О.Оюунцэцэгийг хүртэл “Амьд барби” хэмээн өргөмжилсөн.

Түүнчлэн дарь нь дээр давс үрнэ гэгчээр Монголын гэрэл зурагчдын дуранд түүний нүд нь улайсан, нүүр нь барзайсан төрх өртчихөв.

Ямартай ч “амьд барби” үнэхээр хэнэггүй хандав уу, эсвэл Монголын үзэгчдэд гологдчихов уу.