МСБХ-ны Үндэсний Дээд лигийн 2022/23 оны улирлын эрэгтэй лигийн плэйоффын тав дахь өдрийн буюу мягмар гарагийн М Гарьд болон Завхан Бродерс багуудын цувралын гурав дахь тоглолт UG Arena-д явагдаж 112-96 харьцаатай өндөрлөлөө. М Гарьд цувралыг 2-1 харьцаатай тэргүүлж эхлээд байгаа буюу хожил байгуулсан хоёр тоглолтдоо хоёуланд нь 15-аас дээш онооны зөрүүтэй Завхан Бродерс багийг хожоод байна.

Тоглолтын баатар: Шилдэг тоглогч бол маргаангүй Клийнтони Өрли. Түүнийг цувралын гурав дахь тоглолтод 41 оноо авч бүх тоглогчдыг тэргүүлсэн юм. Мөн энэ улирлын плэйоффын нэг тоглолтод +40 оноо авсан хоёр дахь тоглогч болж байна.

Түүнээс гадна цувралын эхний тоглолтод 4 минут тоглож, хоёр дахь тоглолтыг өнжсөн А.Энхбаясгалан 20 оноо, 8 самбар авч дабл дабл хийхэд ойрхон байлаа.

Hero to zero: Тус тоглолтод будагтай талбайгаас М Гарьд баг 52 оноо авсан бол Завхан Бродерс баг 40 оноо авсан юм. Завхан Бродерс багийн оноог явуулах гол тоглогчдын нэг Даймонд Стөүн маш хангалтгүй тоглож ердөө 7 оноо авч 30 хувьтай довтолсон байна.

Тоглолтын эргэлтийн цэг: Тоглолтын хоёрдугаар үеийн цаг сүүлийн 5 минут руу ороход онооны харьцаа 38-36 харьцаатай байхад М Гарьд баг 9-0 run хийж 11 онооны зөрүү бий болгосноос хойш онооны зөрүү 10 дотор ороогүй явсаар М Гарьд багийн хожлоор өндөрлөсөн юм.

Статистик худлаа хэлдэггүй: М Гарьд багийн гараанд таван тоглогч нийлээд 99 оноо авсан бол Завхан Бродерс багийн гарааны тавт нийлээд 61 оноо авчээ.