Дэлхийн хамгийн өндөр настай хүн Японд  амьдардаг гэх ойлголт аль хэдийнэ хоцрогдож буй бололтой. Учир нь саяхан Индонезоос 145 настай Мбах Гото гэгч эр олдсон гэнэ.

Түүний төрсний гэрчилгээ дэх  он нь 1870  бөгөөд хөгшин эр 1992 оноос  хойш үхэлдээ бэлтгэсэн хэдий ч, 24 жил амьд мэнд аж төрсөөр байгаа гэнэ.  Хөгшин дөрвөн эхнэр, хүүхдүүдийнхээ хамт 10-уулаа амьдардаг юм байна.  Орон нутгийн нэгэн сайтад өгсөн ярилцлагадаа тэрбээр “Үхэхийг л хүсч байна” гэж ярьжээ. Сүүлийн гурван сарын турш хөгшний бие ядарч сульдах болсноос гадна усанд  орж, халбагаар хооллож ч чадахаа больжээ. Мбах Гото 1870 оны арванхоёрдугаар сарын 31-нд төрсөн аж.

Өнөөдрийг хүртэл дэлхий дээр хамгийн урт насалсан тохиолдол Францад гарч байв. Тус улсын иргэн Жанне Калмент гэгч эмэгтэй 122 насалж байсан юм. Гэтэл Мбах Гото түүнээс 23-аар их насалжээ.  Гэхдээ индонез эр өөрийн амжилтаа Гиннест бүртгүүлэхийг огт хүсэхгүй байгаа гэнэ. Харин урт насалсан нууцаа “Ердөө тэвчээр” гэж товчхон хариулжээ.