Азийн хөгжлийн банкнаас таван улсын долоон хотод цэвэр агаарын үйл ажиллагааны төлөвлөгөө боловсруулах техник тусламжийн төслийг Ricardo-AEA limited компани болон Clean Air Asia байгууллагын дэмжлэгтэйгээр хэрэгжүүлж байгаагийн нэг нь Орхон аймаг юм. Агаарын чанарыг сайжруулахтай холбоотой мэдлэг, үйл ажиллагааг бэхжүүлэх төслийг 2018 оноос Орхон аймагт хэрэгжүүлж, энэ хугацаанд аймгийн агаарын чанарт нөлөөлж буй хүчин зүйлсийг тандах, шинжилгээ судалгааг хийсэн байна.

Өнгөрсөн тавдугаар сард Эрдэнэт хотын Цэвэр агаарын үйл ажиллагааны төлөвлөгөөний сонирхогч талуудын уулзалт зохион байгуулж, Орхон аймгий агаарын бохирдлын үнэлгээний тайланг танилцуулсан. Өнөөдөр ажлын хэсгийн гишүүдэд Цэвэр агаарын үйл ажиллагааны төлөвлөгөөний арга хэмжээ, хугацааны төслийг танилцуулав. Ажлын хэсгийн гишүүд энэхүү арга хэмжээний агуулгыг баталгаажуулан холбогдох салбарууд болон хотын агаарын чанарын зорилтуудтай уялдуулах боломжтой юм. Мөн уулзалтын үр дүнг Цэвэр агаарын үйл ажиллагааны төлөвлөгөөний төслийг илүү боловсронгуй болгоход ашиглах юм байна.

Төслийн гүйцэтгэгч байгууллагаар Англи улсын Ricardo-AEA limited компани ажиллаж байгаа бөгөөд судалгааны үр дүнг боловсруулж Агаарын чанарын загварчлалыг боловсруулжээ. Уг загварчлал, судалгааны үр дүнд үндэслэн Эрдэнэт хотын агаарын чанарыг сайжруулах, цэвэр агаарын төлөвлөгөөг боловсруулах ажлыг энэ онд хийхээр төлөвлөсөн байна. Орхон аймагт гурван жилийн хугацаанд хийсэн дээрх судалгааны үр дүнгээр агаарын чанарт гэр хороолол, автомашин, зам дэд бүтэцтэй холбоотой тоос шороо, жижиг оврын уурын зуух голчлон нөлөөлж байгааг тогтоожээ. “Нөлөөлж байгаа хүчин зүйлсийг тогтоосон судалгаатай болно гэдэг бидэнд том боломж. Цаг хугацаа, төсөв мөнгийг үргүй хоосон зарцуулахаар юу хийх нь ойлгомжтой, тодорхой зүйлийг олж харах учраас бодит үр дүн гарна гэдэгт итгэлтэй байна” гэж аймгийн удирдлагууд онцолж байна. Төсөл 2023 онд хэрэгжиж дуусах бөгөөд үр дүнд агаарын чанарыг сайжруулах бодлого үйл ажиллагааны төвшинд цэвэр агаарын төлөвлөгөөтэй болох юм.