Богдхан уулын Дугуй цагаан руу явах зам дахь амралтын газрыг албадан буулгах үеэр цагдаагийн байгууллага ямар үүргээр ажилласан тухай мэдээлэл өглөө.

Нийслэлийн цагдаагийн удирдах газрын дэд дарга Б.Оюутболд "Албадан буулгах энэ ажиллагааг мэргэжлийн байгууллагууд нь явуулсан. Цагдаагийн байгууллагын зүгээс төрийн захиргааны болон үйлчилгээний алба хаагчид, иргэдийн хооронд үр ойлголцол гарч хэв журам алдагдахаас урьдчилан сэргийлж үүргээ гүйцэтгэсэн. Иргэдийн хооронд үл ойлголцол үүсэх, иргэдийн амь нас болон эрүүл мэндэд хохирол учрахаас урьдчилан сэргийлж, хэв журам сахиулах чиглэлээр өчигдөр цагдаагийн алба хаагчид ажилласан. Цагдаагийн байгууллагаас Монгол Улсад дагаж мөрдөж байгаа хууль тогтоомжийн хүрээнд гэмт хэргээс урьдчилан сэргийлэх, илрүүлэх, таслан зогсоох чиг үүрэгтэй ажилладаг. Үүнээс гадна нийт 200 орчим хуулийн хүрээнд ажиллаж, төрийн байгууллагууд үйл ажиллагаа явуулахад дэмжлэг үзүүлэх хууль эрх зүйн зохицуулалт байдаг" гэж хэлсэн юм.

ЦЕГ-ын ХМТ-ийн дарга Б.Баатархүү "Цагдаагийн байгууллага санаачилгаараа тэнд очиж үйл ажиллагаа явуулаагүй. Гарсан захирамжийн үүднээс хяналт тавсан. Согтуу байсан, машин түрсэн хүмүүсийг шалгасан. Хоёр талын байр суурь маргаантай асуудал гарсан. Тэр дунд нь хэвлэл мэдээллийн ажилтнууд байсан. Парламент телевизийн сэтгүүлч н.Гэрэлмаа өчигдөр надтай холбогдсон. Сэтгүүлчийн биед гэмтэл учруулсан байж болзошгүй хэмээн дүүрэгт дэх цагдаагийн газарт хэрэг нээсэн. Гэмтлийн зэрэг тогтоох, холбогдох үйл ажиллагаа явагдана. Сэтгүүлчийн бичсэнчлэн ЦЕГ дотоод албаны шалгалт хийнэ. Хэн нэгний гэм буруугийн асуудлыг ярих боломжгүй. Сэтгүүлчийн гомдолтой холбоотой асуудлыг мөрдөн байцаах тасагт хийнэ. Гэм буруугийн асуудлыг ярихад эрт байна. Тодорхой хугацаанд шалгалт хийгээд хариулт өгнө" гэв.