Хүн төрөлхтний агуу хайр сэтгэлийн тухай өгүүлэх У.Шексперийн “Ромео Жульетта” жүжиг Улсын драмын эрдмийн театрын тайзнаа гурав дахь удаагийн найруулгаар тавигдаад байгаа билээ. Тодруулбал, 1966 онд найруулагч С.Гэндэн, 1996 онд Ч.Найдандорж найруулан тавьж байсан.

Тэгвэл энэхүү жүжиг 19 жилийн дараа Монголын театрын тайзнаа Н.Наранбаатарын найруулгаар дахин амилаад буй. Үзэгчдэд хүрсэн цагаасаа эхлэн  “Ромео Жульетта” жүжиг шагналын хурыг дагуулж байгаа гэхэд болно. Тус жүжиг “Гэгээн муза” наадмаас зургаан муза хүртэн Гранпри шагналын эзэн болж байсан. Мөн энэ сарын 11-16-ны өдрүүдэд Буриадын Улан-Үдэ хотноо болсон “Алтан Сэргэ” олон улсын театрын наадамд оролцож, “Шилдэг эрэгтэй дүр”, “Шилдэг эрэгтэй туслах дүр”, “Шилдэг эмэгтэй туслах дүр”, “Шилдэг хөгжмийн зохиолч” номинацид тэргүүлж, шагнал хүртсэн баярт мэдээг дуулгасан билээ.

Түүнчлэн энэхүү бүтээлийг Н.Наранбаатарын найруулгаар 65 удаа тавьсан бөгөөд 31500 хүн үзээд байгаа аж. Сонирхуулахад, “Ромео Жульетта” жүжиг энэ сарын 23-25-нд дахин тоглогдох юм байна.