АНУ-ын төрийн тэргүүн Барак Обамагийн бүрэн эрхийн хугацаа ирэх оны нэгдүгээр сард дуусч, тэрбээр арваннэгдүгээр сард болох Ерөнхийлөгчийн сонгуульд ялалт байгуулсан эрхэмд үүрэгт албаа хүлээлгэн өгөх учиртай.  Одоогоор АНУ-ын дараагийн Ерөнхийлөгчийг сонгох сонгуульд Ардчилсан намаас төрийн нарийн бичгийн дарга асан Хиллари Клинтон,  Бүгд найрамдах намаас үл хөдлөх хөрөнгийн тэрбумтан Доналд Трамп нар нэр дэвшин өрсөлдөж байгаа юм.  Хамгийн сүүлд явуулсан олныг хамарсан судалгааны дүнгээс харахад, Хиллари Клинтон олонхийн дэмжлэгийг хүлээгээд буй.

Харин “Мексик АНУ-ын хилд битонон хана босгоно”, “Лалын шашинтнуудыг хил нэвтрүүлэхгүй”, “Хууль бус цагаачдыг нутаг буцаана” гэх зэргээр ширүүхэн мэдэгдлийг хийж, олны дургүйцлийг төрүүлсэн Доналд Трампын дэмжигчдийн хувьд өмнөхөөсөө унасан үзүүлэлттэй байгаа.  Гэвч сүүлийн үед тус улсын нэртэй эмэгтэй улстөрч болох Хиллари Клинтоны эрүүл мэндийн бай­дал америкчуудын санааг зо­воох болсон юм.  Улмаар энэ сарын 11-нд болсон 2011 оны тер­ро­ризмын гашуудлын үйл ажил­лагааны үеэр тэрбээр уушиг­ны хатгалгаа туссаныг эмч нь баталсан байдаг.

Тэгвэл энэ­хүү явдлыг өрсөлдөгч нь өл­гөн авч,  “Клинтон эрүүл мэн­дийн хувьд АНУ-ын Ерөн­хий­лөгчид тэнцэхгүй” гэх зэргээр мэдэгдэл хийж, сонгуулийн уур амьсгалыг өөрт ашигтайгаар эргүүлэхийг хичээж эхэлсэн.  Үүний улмаас олон улсын зарим эх сурвалж Хиллари Ерөнхийлөгчийн сонгуулийг орхих эсэх талаарх таамгийг аль хэдийнэ дэвшүүлж эхлэв. Хэрэв Ардчилсан нам АНУ-ын Ерөнхийлөгчийн сонгуу­лиас нэр дэвшигчаа бу­цаан татвал, оронд нь хэнийг нэр дэвшүүлэх вэ. Энэ асуулт олны анхаарлыг хамгийн их татаж байна.  

Эдүгээ 68 настай нэр дэвшигч Хиллари Клинтон эрүүл мэндийн шалтгааны улмаас Нью Йорк мужийн Чаппак дахь гэртээ эмчилгээ хийлгэж буй бөгөөд тэрбээр энэ сарын 12, 13-ны өдөр  Калифорнид болох уулзалтуудаа цуцалсан. Энэ явдал эмэгтэй улстөрчийг сонгуулийн тулаанаас гарах таамгийг бүр лавшруулж орхив. АНУ-ын Үндсэн хуульд Ерөнхийлөгчийн сонгуульд нэр дэвшиж буй эрхэм ямар тохиолдолд нэрээ татаж болох талаар тодорхой зүйл тусгагдаагүй ч, тухайн намын дүрэмд тусгасан байдаг ажээ.

Ардчилсан намын дүрмийн хоёрдугаар зүйлийн долоод, “Ардчилсан намын Үндэсний зөвлөлдөх хорооны дарга нэр дэвшигчийн сул орон тоог нөхөх зорилгоор шуурхай хуралдааныг нээнэ” гэж заажээ. Бүгд найрамдах намын дүрэмд ч ийм заалт байдаг юм байна.  Ардчилсан намын тусгай хуралдаанд хамгийн их дэмжлэг авсан эрхэм хоосон орон тоонд нэр дэвших учиртай юм байна. Гэхдээ өмнөх сонгуульд ийм тохиолдол гарч байгаагүй гэнэ. 

Ямартай ч, одоогийн нөхцөлд Хиллари Клинтон эрүүл мэндийн шалтгааны улмаас сонгуулийн тулаанаас нэрээ татах магадлал тун өндөр байгаа бөгөөд зарим ажиглагчид аль хэдийнэ түүний оронд нэр дэвших эрхэм хэн байхыг таамаглаж эхэлсэн байна. Тэдний нэрлэж буйгаар хамгийн боломжит хэд хэдэн хувилбар бий аж. Үүнд,   сенатч Тим Кайне,  нам доторх сунгаанд өрсөлдсөн сенатч Берни Сандерс, одоогийн дэд Ерөнхийлөгч Иосеф Байден нарын нэр багтжээ.  Одоогоор нөхцөл байдлыг тааварлахад бэрх байгаа ч, Хиллари эрүүл мэндийн шалтгааны улмаас нэрээ татвал Ардчилсан намаас өөр хүн нэр дэвших бололтой. Гэхдээ түүний сонгуулийн штабынхан өнөөдрөөс Хиллариг кампанитаа дахин эхлүүлнэ гэх мэдэгдлийг хийгээд буй.