Хуучин Гадаад харилцааны яамнаас зохион байгуулдаг байсан “Мэдээллийн цаг”-ийг Гадаад харилцааны сайд Ц.Мөнх-Оргил үргэлжлүүлэхээр шийдсэн байна. Өөрөөр хэлбэл,  Монгол Улсын гадаад харилцаа, хамтын ажиллагааны талаар сард нэг удаа мэдээлэл хийх юм байна. Энэ удаагийн “Мэдээллийн цаг”-аар Гадаад харилцааны сайд Ц.Мөнх-Оргил, Гадаад худалдаа эдийн засаг, хамтын ажиллагааны газрын захирал В.Энхболд, Консулын газрын захирал Я.Ариунболд нар мэдээлэл хийлээ. Гадаад харилцааны сайд Ц.Мөнх-Оргил хэлэхдээ “2016-2020 оны Засгийн газрын үйл ажиллагааны мөрийн хөтөлбөр батлагдсан. Энэхүү хөтөлбөрт гадаад харилцааны чиглэлээр 13 асуудал тусгагдсан.

Монгол Улс дэлхийн 186 улстай дипломат харилцаатай байдаг. Энэхүү харилцааг эдийн засгийн хамтын ажиллагаа, худалдааны эргэлтийг нэмэгдүүлэхэд чиглүүлэх зорилго тавьсан. Нэг ч гэсэн бизнес эрхлэгчдээ түнш олж өгөхийн төлөө ажиллах үүргийг дипломат төлөөлөгчийн газарт өгсөн. Дипломат төлөөлөгчийн газар ажиллаж байгаа хүмүүсийн ажлыг үүгээр дүгнэнэ. Хоёрдугаарт, Монгол Улсыг гадаадад сурталчлах, давтагдашгүй соёлын өвийг соёлын илч төлөөлөгчөөр дамжуулан сурталчлах ажилд онцгой анхаарах үүрэг даалгаврыг УИХ, Засгийн газраас өгсөн.

Гуравдугаарт, Гадаадад ажиллаж амьдарч байгаа 130 мянган иргэний эрх ашгийг хамгаалах асуудал юм. Ингэхдээ гадаадад байгаа Монгол хүн бүр Монгол төрийн хайр ивээлийг хүртдэг нөхцөл бололцоог бүрдүүлэх үүрэг даалгаврыг өгсөн. Эдгээр асуудлыг тусгасан Засгийн газрын мөрийн хөтөлбөрийг хэрэгжүүлэх арга хэмжээний төлөвлөгөө гарна. Энэхүү төлөвлөгөөний дагуу ажил нэлээд эрчимтэй явагдаж байна.

Бид хоёр их гүрэнтэйгээ иж бүрэн стратегийн түншлэл хэрэгжүүлэх асуудал дээр онцгой анхаарч ажиллана. Монгол Улсад хөрөнгө оруулах сонирхолтой гадаад иргэдийн итгэлийг сэргээх тал дээр ч ажиллана. Энэ чиглэлээр зохион байгуулсан ажлын үр дүнг, УИХ болон Засгийн газарт тайлагнах болно” гэлээ.

Хилийн чанадад 246 иргэн гэмт хэрэгт холбогджээ

Консулын газрын мэдээлж буйгаар хилийн чанадад түр болон удаан хугацаагаар ажиллаж, амьдарч буй иргэд, мөн хувийн болон албан хэргээр зорчсон монгол иргэд гэмт хэрэг зөрчилд холбогдох, аваар осолд өртөх, эд хөрөнгө, эрүүл мэнд, амь насаараа хохирох явдал гарсаар байгаа аж. Тодруулбал, Хилийн чанадад гэмт хэрэгт холбогдсон буюу ял эдэлж буй монгол иргэдийн тухайд  энэ оны нэгдүгээр сарын 1-нээс есдүгээр дүгээр сарын 12-ны байдлаар 246 иргэн гэмт хэрэгт холбогджээ.

Мөн өнөөдрийн байдлаар 13 улсад нийт 99 монгол иргэн ял эдэлж байгаа гэнэ. Харин Монголд гэмт хэрэгт холбогдсон буюу ял эдэлж буй гадаад иргэдийн тухайд Цагдаагийн ерөнхий газар, Шүүхийн шийдвэр гүйцэтгэх ерөнхий газраас мэдээллийг нэгтгэсэн байна.

Энэ оны есдүгээр сарын 12-ны байдлаар Монгол Улсын нутаг дэвсгэрт гадаадын 34 иргэн гэмт хэрэгт холбогдон шалгагдсаны дотор БНХАУ-ын 17, БНСУ-ын зургаа, ОХУ-ын дөрөв, АНУ-ын гурав, Вьетнам, Унгар, ХБНГУ, Израль улсын тус бүр нэг иргэн байгаа ажээ. Түүнчлэн өнөөдрийн байдлаар гадаадын 20 иргэн баривчлах, цагдан хорих байранд хоригдож байгаа бол долоон улсын 22 иргэн ял эдэлж буй юм байна.

Автобус нь шатсаны улмаас эд зүйлсээ алдсан иргэдийг асуудал юу болов

Бээжин-Замын-Үүд чиглэлд зорчиж байсан автобус шатсантай холбоотойгоор зорчиж явсан 37 монгол иргэний хохирлыг барагдуулах чиглэлээр Гадаад харилцааны яам Монгол Улсаас БНХАУ-д суугаа ЭСЯ-аар дамжуулан тээвэр гуйцэтгэж байсан “Есөн луу" компанитай тогтмол холбоотой ажиллаж байгаа аж.

Дээрх иргэдийн хувьд хохирлоо барагдуулахаар “Есөн луу” компанид өргөдөл гаргаж, галд шатсан эд зүйлсийнхээ үнийн дүнг баталгаажуулж өгөөд байсан бөгөөд үүний дагуу тус компанийг даатгагч компанийн зүгээс эдгээр иргэний хохирлыг бүрэн барагдуулах шийдвэр гаргажээ.

“Есөн луу” компанийн зүгээс хохирсон иргэдтэй холбогдож, Эрээн дэх салбараараа дамжуулан нөхөн төлбөр олгож эхэлсэн аж. Одоогийн байдлаар есөн иргэний хохирлыг барагдуулаад байгаа бөгөөд нөхөн төлбөр өгөх ажиллагаа үргэлжилж байгаа гэнэ.

ОХУ-д амиа алдсан иргэдийн цогцсыг олжээ

ОХУ-ын Красноярск хотноо өнгөрсөн наймдугаар сарын 30-ны өдөр Монгол Улсын хоёр иргэн усанд живж амь насаа алдсан хэрэг гарсан билээ.

Тэгвэл энэхүү хэрэг гарсан даруйд буюу есдүгээр сарын 01-нд Гадаад харилцааны яамны зүгээс Эрхүү дэх Ерөнхий консулын газраар дамжуулан ОХУ- ын ГХЯ-ны Красноярск дахь төлөөлөгчийн газарт эрлийн ажлыг шуурхай явуулах хүсэлт тавьсны дагуу нэг иргэний /талийгаач О/ цогцсыг олсон байна.

Харин нөгөө иргэний /талийгаач Д/ цогцсыг хайх ажиллагаа явагдаж байсан бөгөөд өчигдөр олсон тухай Оросын талаас урьдчилсан байдлаар мэдэгдсэн байна. Талийгаач О-гийн цогцсонд хийсэн задлан шинжилгээний дүгнэлт гарсан бөгөөд ямар нэгэн гадны нөлөөгүй болох нь тогтоогдсон байгаа ажээ.

Амиа алдсан уулчны хэрэгт хоёр хүнийг холбогдуулан шалгаж байна

Хангай нурууны оргилд гарах зорилгоор найзынхаа хамт Монголд ирсэн Их Британийн уулчин бусдад дээрэмдүүлж, амиа алдсан хэрэг гарсан. Тодруулбал, өнгөрсөн наймдугаар сарын 31-ний өдөр Архангай аймгийн Хангай сумын Тэрх багийн нутаг Хандрагат гэх газарт амь насаа алдсан байдалтай олдсон.

Цагдаагийн байгууллагаас өгсөн мэдээллээр тэрээр ир, үзүүртэй зүйлээр цээжний хөндийд хатгагдаж нэвтэрсэн шархны улмаас гадна болон дотуур цус алдаж нас барсан байх магадлалтай гэсэн урьдчилсан дүгнэлт гарсан байна. Уг хэргийг Архангай аймгийн Цагдаагийн газар, Улсын Мөрдөн байцаах газрын онц ноцтой хүнд гэмт хэрэгтэй тэмцэх тасгийн хамтарсан ажлын хэсэг шалгаж байгаа аж.

Одоогоор хоёр хүнийг сэжигтнээр саатуулаад байгаа бөгөөд  хэргийн газраас олдсон нотлох баримтуудыг шинжилгээнд өгөөд байгаа юм байна. ГХЯ-ны Консулын газрын зүгээс дээрх хэрэгтэй холбоотойгоор ИБУИНВУ-ын ЭСЯ-тай тогтмол холбоотой ажиллаж, ЭСЯ-наас тавьсан хүсэлтийн дагуу талийгаачийн шарилыг эх оронд нь хэрхэн хүргүүлэх болон хэргийг мөрдөн байцаах үйл ажиллагаатай холбоотой шаардлагатай мэдээл­лийг тогтмол өгч байгаа аж.

БНСУ-д газар хөдлөлтөд Монгол иргэн өртөөгүй гэв

БНСУ-ын Онцгой байдлын газрын энэ сарын 13-ны өдрийн өглөөний 05:00 цагт гаргасан дүгнэлтээс үзвэл Кёнсанд найман хүн, Кёнбүгд тав, Тэгү хотод хоёр, Чоннам аймагт нэг хүн бэртсэн гэнэ. Гэхдээ Монгол иргэн газар хөдлөлтөд өртөж, гэмтээгүй юм байна.

Ийнхүү мэдээлэл хийсний дараа Консулын газрын дарга Я.Ариунболдоос зарим зүйлийг тодруулсан юм.

-Хөрөнгө оруулагчдын итгэлийг сэргээх үүднээс Гадаад харилцааны яам ямар ажил хийх вэ?

-Сүүлийн 3-4 жил гадаадын хөрөнгө оруулагчдын тоо эрс буурсан. Харин энэ Засгийн газрын мөрийн хөтөлбөрт гадаадын хөрөнгө оруулагчдын итгэлийг сэргээх, орчноо сайжруулахаар төлөвлөсөн байгаа. Өнгөрсөн хугацаанд Монгол Канадын Засгийн газар хоорондын хөрөнгө оруулалтын хэлэлцээр олон жил хүлээлттэй байсан.

Сая Канад улсын парламентын нийтийн танхимын дарга айлчлах үеэр гарын үсэг зурагдсан. Ер нь бол гадны хөрөнгө оруулалтыг татах хамгийн чухал асуудал бол эрх зүйн орчин болоод хүний нөөц тогтвортой байх явдал юм. Түүнээс татварын хөнгөлөлт чухал биш.

-Өнгөрсөн долоо хоногт цахим ертөнцөөр Монгол Улс давхар иргэншлийг зөвшөөрнө гэсэн утга бүхий мэдээлэл тархсан. Энэ талаар тодруулаач?

-1998 оноос хойш хилийн чанадад 4800 хүүхэд төржээ. Эдгээрийн 2181 хүүхэд давхар иргэншлийн асуудалтай байгаа аж. Тухайлбал эцэг, эх нь АНУ-д оршин суудгийн улмаас Америкт төрсөн хүүхэд автоматаар тухайн улсын иргэншилтэй болдог. Эдгээр хүүхдүүдийг Монгол Улсын иргэнээс хасмааргүй байгаа юм.

Тэгэхээр Монгол аав, ээжтэй гадаадад төрсөн монгол хүүхдүүдэд давхар иргэншлийг зөвшөөрөх, олгох асуудал яригдаж байгаа гэдгийг ойлгоорой. Мөн 1990-ээд оны эхээр манай баруун хязгаар оршин суудаг казах иргэд Казахстан улс руу нүүсэн. Гадаадын иргэн харьяатын асуудал эрхэлсэн газрын статистик мэдээллээр Монголын 40 гаруй мянган иргэн Казахстаны харьяат болсон.

Монгол Улсынхаа харьяатаас гарч амжаагүй байхад тухайн улсын иргэн болох асуудлаа шийдүүлээд яваад байсан учир 90-ээд оны сүүлээр 25 мянган казах иргэн хоёрдмол харьяалалтай байсан. Казахстаны талтай зөвлөлдөх уулзалтыг хийсний үр дүнд дээрх тоог 2700 хүртэл бууруулж чадсан. Үүнээс гадна Казахстан, Монголын зөвлөлдөх уулзалтын үеэр хоёрдмол харьяаллыг арилгах, иргэншлээ солих асуудлыг хөнгөвчлөх асуудлаар хоёр талын хэлэлцээр байгуулахаар болсон.

-Өмнөд Солонгос улсын виз хөнгөвчлөгдсөнтэй холбог­дуулан визны хугацаа хэтрэлт нэлээд их байна. Үүнийг хэрхэн зохицуулж байна вэ?

-Солонгос улс руу гарах хүсэлтэй 50 мянган иргэн нэг жилд виз мэдүүлдэг. Үүнийг хариуцан ажиллаж байгаа Солонгосын Элчин сайдын яамнаас мэдээлж буйгаар 95 хувьд нь виз олгосон байгаа юм. Гэтэл өнөөдөр нэг сард дунджаар 360 хүн визны хугацаа хэтрүүлэн үлдэж байна.

Энэ нь Солонгос улсад хугацаа хэтрүүлэн үлдэж байгаа буюу харлаж байгаа үзүүлэлтээрээ Монгол Улс тэргүүлж байна гэсэн үг. Үүнээс болоод визны нөхцлийг хөнгөвчлөх асуудал ярвигтай болно. Өөрөөр хэлбэл, зөвхөн өнөөдөр маргаашаа бодож үлдээд байгаа хүмүүсийн нөлөөгөөр виз хөнгөвчлөх нөхцлийг удаан үргэлжлүүлэхэд амаргүй болж байна гэсэн үг юм.