“Улаанбаатар түншлэл” үзэсгэлэн худалдааг  сонирхоод явж байтал  “Сайхан” нэрийн  ээзгийтэй, ааруултай, борцтой цай өөрийн эрхгүй нүдэнд туслаа. Амталгаа явагдаж байна.  Аяны нөхцөлд гэлтгүй  гэр орноосоо хол ажиллаж амьдарч буй монголчуудад  эх орныг нь бодогдуулах нуугисан хийцтэй цайны амт яанзтай. Хоёр аяга уухад л хөлс чийхарч, ядаргаа тайлагдахаар.  Уг бизнесийг гэр бүлийн хоёр эрхэлдэг аж. Хосууд  бизнесээ эрхлээд удаагүй ч  бүтээгдэхүүнээ зах зээлд борлуулах аргаа олжээ.  Савлагаа, баглаа боодол нь цаанаа л  донжлог. Залуучуудын тархи арай өөрөөр сэтгэж байна шүү гэх бодол зурс хийснийг нуугаад яах вэ.      “ECO MOOD” ХХК-ийн захирал    Баатарсүрэн овогтой Анхбаяр, Өнөрбаатар овогтой Халиун нарыг “ Монгол хүн, Монгол амжилт” буландаа урьлаа. 

-Юуны өмнө та хоёртоо баяр хүргэе. Танай компаний үйлдвэрлэж буй цайны жор  Монголд үйлдвэрлэж буй цайнаас тэс өөр юм байна.  Гайхалтай гэж хэлэхэд ч багадмаар? 

- Анхбаяр:  Энэ бол манай гэрийн   цайны жор. Ээжийн минь чанасан цай цаанаа л амттай. Өсөхөөс өдий хүртэл өглөө бүр уудаг цай минь бизнес болж биднийг тэжээнэ гэдэг бурханы хишиг  шүү. Хүн бүрийн ээж өөр өөрийн жор бүхий цай чанадаг. Харин миний ээжийнх тэс өөр, маш өвөрмөц амттай,  муухан хоолноос дээр.  Ээжийн маань  ээж ч ийм л цайг чанадаг байсан гэсэн. Оюутан болоод гадагшаа сургуульд явах болоход хуурай цайндаа шар тос багсараад өгч явуулна. Ядрах, гэрээ санах, ханиад хүрэх үедээ  ээжийнхээ цайг чанаад ууна. Бүх биений хөлс гараад л нойр хүрч эхэлнэ. Унтаад сэрэхэд эрүүл болсон байдаг, тийм шидтэй цай.   Бид хоёр гэр бүл болсныхоо дараа залуу хүний хувьд гадна, дотны маш олон цайг худалдан авч хэрэглэж үзсэн ч монгол цайны амтыг гүйцэхгүй байсан.  Монгол хүний бие организм будаа, загасхан иддэг бусад улс үндэстэнийхээс тэс өөр. Байгал цаг агаар нь ч эрс тэс. Тиймээс өвөг дээдэс минь тусгай жор бүхий цайг бий болгосон хэрэг. Уламжлалт жор шүү дээ, уг нь. Харин түүнийг бүтээгдэхүүн болгож зах зээлд гаргасан нь бидний санал санаачилга. Цайны бизнес бол ариун, өгөөжөө өгдөг бизнес. Идээний дээж шүү дээ. 

-Та хоёр хүнс  үйлдвэрлэлийн чиглэлээр мэргэшсэн  үү?

 -Халиун: Миний хань барилгын архитекторч  харин би эдийн засагч мэргэжилтэй. Хадам ээж маань  хүнсний салбарт олон жил ажилласан нэгэн. Тиймээс бид хоёрын бизнесийг дэмжин технологи тал дээр нь заавар, зөвлөгөө өгч,  бизнесийг маань хөл дээрээ босох хүртэл хамтдаа зүтгэсэн.  Одоо  бид  хоёр бараг л  мэргэжлийн хүмүүс болсон доо. 

-Залуу  гэр бүлд  бизнес эрхлэхэд гарааны асуудал хүнд байдаг.   Зээл тусламж авсан уу?

-Хамгийн анхны цайгаа яаж үйлдвэрлэж байв,  мөн  анхны захиалга нь   хаанаас ирсэн бэ?

-Халиун: Бэлдэц найруулдаг машин бидэнд байсан, хадам  аав маань савлагааны машин  худалдаж авч өгснөөр асуудал ерөнхийдөө шийдэгдсэн.  Ингээд л  ээжийнхээ жороор цайгаа ууталж  савласан. Хамгийн анхны захиалгыг БНСУ-д амьдардаг монголчуудаас  маань өгч, тэдэнд зориулж бүтээгдэхүүнээ үйлдвэрлэсэн.

-Хүнсний бүтээгдэхүүн  хүний амь нас , эрүүл мэндтэй салшгүй холбоотой. Тиймээс  чанар,  стандарт , хадгалалтын горим, сав баглаа боодлын асуудал цайны жортой зэрэгцэхүйц зүйл болов уу?

-Тэгэлгүй яах вэ,   манай ээж хүнсний (нэрийг нь хэлхийг хүссэнгүй) компанитай. Тэр үйлдвэр стандарт, ариун цэвэр, эрүүл ахуй талаасаа үйлдвэрлэлийн шаардлагыг хангасан  газар.  Түүнд нь түшиглээд, тэр орчинд нь манайх бүтээгдэхүүнээ үйлдвэрлэж эхэлсэн.  

- Компани хэдийд бие даав, өөрийн гэсэн үйлдвэртэй болж амжсан уу?

-Анхбаяр: Бид хоёр компаниа энэ оны тавдугаар сарын 21-нд  байгуулсан төдийгүй өөрийн гэсэн шинэ үйлдвэртэйгээр бүтээгдэхүүнээ үйлдвэрлэж  эхэлсэн. Шинэ үйлдвэрийн тухайд эхнэрийн минь аав маань машинаа зарж гадна, дотно талын сав баглаа боодол захиалхад, үйлдвэрээ үйлдвэрийн зориулалтаар тохижуулхад маш том тус хүргэсэн. Лабораторийн  шинжилгээ, хяналт шалгалт, наадам гэж бужигнаж байгаад  долдугаар сарын сүүлээр бүтээгдэхүүнээ үйлдвэрлэж эхэлсэн.

-Бүтээгдэхүүндээ патент авч баталгаажуулсан уу?

-Ямар ч байсан хүнсний аюулгүй байдлын лабораторид шинжилгээ өгч баталгаажуулсан, мөн оюуны өмчийн газар хандаж эрхээ баталгаажуулсан одоо 

гарах хугацаа нь болсон. Бид хоёр ер нь үйлдвэрлэл эрхлэх, үйл ажиллагаа гээд бүх юмаа ном журмынх нь дагуу хийж гүйцэтгэж байгаа.

-Сав баглаа боодол харахад л нүдэнд тусахуйц гоё хийц загвартай  харагдаж байна?

-Анхбаяр: Тийм шүү, гоё дизайнтай байгаа биз, эхнэр маань гаргасан загвар. Манайх бүх юмаа дотооддоо  хийлгэе гэж шийдээд гаднах хайрцгаа Финпак үйлдвэрт, доторхи жижиг сав баглаа боодлоо Монлабель гэдэг компанид захиалдаг. Урд хөршид захиалж болно л доо. Нэг бүрийнх нь үнэ ч хямд байж мэднэ. Гэвч  цар тахлын энэ хүнд үед бид бие биенээ дэмжих ёстой гэдэг үүднээс дотооддоо хийлгэж байгаа.  Би өөрөө англи, хятад хэлтэй хүссэн юмаа захиалаад авчихдаг гэхдээ бүгдийг нь эх орондоо л хийлгэхийг хүссэн. Бас нэг анхаарсан зүйл гэвэл гадагшаа экспортод гаргахыг хүсч байгаа болохоор  сав баглаа боодол дээр  маш их  анхаарч байгаа.

-Хэрэглэгчдийн сэтгэгдлийг сонсов уу, юу гэж байх юм, зарим үйлдвэрүүд бүтээгдэхүүн нь хүнд танигдаад эхэлмэгц орц найрлага нь багасаад, үнэ нь нэмэгдээд ирдэг?

-Бүтээгдэхүүн  маань зах зээлд хөл тавиад удаагүй ч хэрэглэгчид мэддэг болсон гэж бодож байна. Манай бүтээгдэхүүнийг амталсан хэрэглэгчдийн “Энэ цайг уугаад ээжийгээ саначихлаа, ямар гоё цай вэ, яг л миний ээжийн цай байна, энэ чинь жинхэнэ эмээгийн цай юм биш үү, сайхан хийцтэй цай уух ийм амархан болчиж байгаа юм уу ”  гэх мэт сайшаасан үг бид хоёрт урам хайрлан улам хүчтэй болгож  өгдөг. Манайх аль болох амт чанараа алдахгүй, үнийн хувьд үндэслэлгүйгээр нэмэхгүй гэсэн чиг шугамтай ажиллаж байгаа. Хойшдоо ч тэгж ажиллана. 

-Гадуур ийм төрлийн савлагаатай цай их байдаг, тэдгээрээс танай бүтээгдэхүүн юугаараа онцлог вэ?

-Тийм ээ их байгаа, гэвч манайх шиг ааруултай, ээзгийтэй гэх төрөл одоогоор байхгүй. Уламжлагдаж ирсэн манай гэр бүлийн жор шүү дээ. Мөн малын гаралтай түүхий эдээр хийдэг. Сав баглаа боодол, үзэмжийн, амт чанарын хувьд ч бусдаас илүү содон, чанартай. Амт чанараа илүү сайжруулах тал дээр байнга ажиллаж байгаа. 

-Цэвэр түүхий эд гэж ярилаа, тэгвэл түүхий эдээс хаанаас авдаг вэ?

-Эрүүл хүнсийг хэрэглэгчдэд хүргэхийн тулд түүхий эдийг Хөвсгөлөөс авдаг, тэнд манай үнээний ферм байдаг. Бид үйлдвэрлэлдээ зориулж МАА-гаа фермер маягаар хөгжүүлж байна, тэндээсээ сүү цагаан идээ, ааруул, ээзгий, борцоо бэлтгэн нийлүүлдэг. Бэлтгэж байгаа түүхий эдээ маш сайн анхаарч, хатуу хяналттай өөрсдөө гардан бэлтгэн авч байгаа. Хэдийгээр жормаань  манай гэр бүлийнх ч гэсэн үндсэн түүхий эдмаань сайн байж, сайн цайг хэрэглэгчдэд  нийлүүлнэ шүү дээ.

- Үйлдвэрлэл болон борлуулалтын тухайд?

- Үйлдвэрийн маань чадал багадаа өдөрт гурван сая төгрөгийн бараа  бүтээгдэхүүн  үйлдвэрлэх боломжтой. Дөнгөж эхэлж байгаа болохоор хамгийн багаар нь л тооцож байна. Манай үйлдвэрийн хувьд бүрэн автомат тул одоогоор  цөөхөн хүнтэй ажилладаг. Харин борлуулалтын хэд хэдэн компаниуд бидэнд саналаа ирүүлсэн. Мэдээж эхлээд дотооддоо борлуулалт хийнэ. Томоохон сүлжээ дэлгүүрүүдээр борлуулалтаа хийж эхэлсэн. Эхний ээлжинд  Сансар супермаркетад нийлүүлсэн.  E-mart сүлжээ дэлгүүрээс бас хүсэлтийг маань зөвшөөрсөн. Өвөр Монголоос маш их санал ирж байна. Хил гааль гайгүй болохоор нийлүүлэхээр тохирсон. Манай бүтээгдэхүүн хэдийнээ хувь хүмүүсээр дамжин Америк, Англи, Солонгос, Герман, Австрали, Японд ажиллаж амьдарч байгаа монголчуудад хүрсэн. Бүр далайн орон болох Малдивт хүртэл оччихсон ааруултай цай ууж байгаа зургаа явуулж бидэнд  талархлын үгээ илгээснийг хүлээж аваад маш их баярласан. Их гоё санагдсан шүү. Ер нь гадаадад байдаг монголчууд илүү их хэрэглэдэг юм шиг санагдсан. Нэрийн барааны дэлгүүрээ нээхээр төлөвлөөд ажиллаж байна. Манай нэрийн барааны үнэт бүтээгдэхүүнд ээзгийтэй цай ордог, ээзгий маань өөрөө хичнээн литр сүүнээс хэр зэрэг багаар гардаг бмлээ мөн элэг цөс , ходоодонд сайн гэдэг утгаараа ч тэр. Ер нь борлуулалт, эрэлтээрээ арай илүү.Энэ хугацаанд нэлээдгүй хэдэн үнэнч хэрэглэгчтэй болсон.

#МонголынМэдээСонин #ЯрилцахТанхим

2021 оны аравдугаар сарын 12. Мягмар. №128 (5533)