Монголын байт харвааны холбооны Дасгалжуулагчдын зөвлөлийн дарга, Олон улсын хэмжээний мастер Н.Дариймаа Монгол Улсын Ерөнхийлөгчийн Зарлигаар Монгол Улсын Гавьяат дасгалжуулагч цол хүртлээ. Тэрбээр 51 жилийн турш байттай амьдралаа холбосон байна.  Монголын байт харвааны холбооны ерөнхийлөгч П.Цагаан тэргүүтэй байтынхан, шавь нар, Монголын үндэсний олимпийн хорооны удирдлагууд болон ар гэрийнхэн нь шинэхэн гавьяатаа хүлээн авч уулзаж, баяр хүргэлээ. Тэдний сэтгэгдлийг товчлон хүргэж байна.

Монголын байт харвааны холбооны Ерөнхийлөгч П.Цагаан:

            -Жаран жилийн түүхтэй байт харвааны спортын шилдгүүдээс гурав дахь гавьяат дасгалжуулагч болсонд баяр хүргэе. 12 жил тасарсан гавьяатын буухиаг үргэлжлүүлж, түүхийн хуудсыг бахархам амжилтаараа баяжуулж байгаа таны 51 жилийн хөдөлмөр зүтгэлийг төр үнэлснийг бид бахархан хүлээж авч байна. Та олон жил байтын спортыг хөгжүүлэхийн төлөө хөлс хүч, авьяас чадвараа дайчлан ажиллаж, олон сайн ном бичсэн. Дахиад ч олон сайхан ном зохиол бичиж, бусдадаа үлгэр дуурайлал үзүүлээрэй гэж ерөөе.

Мастеруудын холбооны дарга Н.Бямбасүрэн:

            -Шинэхэн гавьяат маань өөрөө олон жил тамирчин байсан, дараа нь олон сайн шавь төрүүлсэн энэ хүн төрийн өндөр шагнал Гавьяат дасгалжуулагч болсонд бид бүгд ялангуяа ахмад тамирчид бид маш их баяртай байна. Булган сүүлтэй байж, дараа дараагийн олон олон гавьяатыг бэлтгэж өгөхийг хүсье.

"Алдар" спорт хорооны дасгалжуулагч  Б.Ганзориг:

-Манай домог болсон сайн тамирчин гэдгийг багш нар ярьдаг байсан. Харвасан сумнууд нь чимхээд оруулсан юм шиг нэг дор зоогдсон байдаг гэх мэтээр. Н.Дариймаа багш маш олон шавь бэлтгэсэн. Бүгд өндөр амжилт үзүүлж байгаа. Багшийг минь төр үнэлсэнд маш их баяртай байна.

Олон улсын хэмжээний мастер, шавь Д.Дуламсүрэн:

-Багш маань ар гэрээ мартах шахам биднийг нартай, бороотойд ч дасгалжуулж сургаж байсан. Багш бидэнд зөвхөн нум сум бай харвахыг заагаагүй амьдрах ухаан, юманд хандах хандлага, ажлыг хийх сэтгэл зүтгэлтэй байх тэр бүх чанарыг суулгаж өгсөн.  Уйгагүй хөдөлмөр, хүч чармайлт сэтгэл зүрхээрээ хоёргүй сэтгэлээр ажилласныг тань төр үнэлсэнд баярлаж байна. Байтынхны олон жил хүлээсэн шагнал хүртсэнд баяр хүргэе.