Их Британийн бэлгийн цөөнхөд зориулагдсан “Attitude” гэх сэтгүүлийн долдугаар сарын дугаарын нүүрийг Их Британийн угсаа залгамжлагч ханхүү 33 настай Уильям чимжээ.  Ингэснээр гэй сэтгүүлийн нүүрт гарсан хааны удмын анхны хүн болсон байна. Ханхүү Уильям энэхүү үйл ажиллагаагаараа Хомофобиа буюу ижил хүйстнийг эсэргүүцэгчид  бэлгийн цөөнхийнхнийг дээрэлхэж, доромжилдаг  хандлагыг өөрчлөхийг зорьжээ.

 

Энэ сарын 12-ны өдөр АНУ-ын Флорида мужийн Орландо хотын ижил хүйстнүүдийн үйлчлүүлэх шөнийн клубт  буутай этгээд халдлага үйлдэж 50 орчим хүн амиа алдсан байдаг.  Энэ хэргийн хариуцлагыг  хэт даврагч “Лалын улс” бүлэглэл өөртөө хүлээсэн юм. Тэгвэл хаан ширээ залгамжлах дарааллаараа хоёрдугаарт бичигдэх Уильям ханхүү “Attitude” сэтгүүлд өгсөн ярилцлагадаа “Кенсингтоны ордонд бэлгийн цөөнхийнхнийг хүлээн авч уулзахад бэлгийн чиг баримжааныхаа улмаас байнга дээрэлхүүлж, зодуулсаар сэтгэцийн эмгэгтэй болсон тухай түүхийг сонссон” хэмээн ярьжээ.

 

Тиймээс гэй хүмүүсийг дээрэлхэж доромжилж буй залуу үеийнхэндээ зөв мессэжийг хүргэх зорилгоор уг сэтгүүлд зургаа авхуулсан  гэж тайлбарласан байна.  Уильям ханхүүгийн зангиа зүүлгүй инээмсэглэсэн зураг бүхий гэй сэтгүүл өчигдрөөс эхлэн хэвлэгдэж эхэлсэн бөгөөд энэ сарын 22-ны өдрөөс эхлэн худалдаалагдаж эхлэх юм байна.