Ичо Каори: Олимпод П.Орхонтой таарчих юмсан гэж бодож байлаа
Японы тамирчин Ичо Каори бол чөлөөт бөхийн босоо аварга. Гэхдээ 20 гаруй жилийн турш чөлөөт бөхийн дэвжээнд тасралтгүй аваргалсан түүнийг Монголын бөх П.Орхон өвдөг шороодуулж, ялалтынх нь буухиаг тасалдуулсан түүхтэй. Энэ ялагдлын дараа хүч нь харьжээ гэх шүүмжлэлд өртсөн тамирчин суут аварга гэдгээ Риогийн олимпод баталж, дөрвөн олимпод дараалан түрүүлсэн анхны эмэгтэй чөлөөт бөхийн тамирчин болсон юм. Тиймээс энэ удаагийн “Оддын цаг” буландаа Японы суут бөх Ичо Каоригийн орон нутгийн хэвлэлд өгсөн товчхон ярилцлагыг орчуулан хүргэж байна. Тэрбээр тус ярилцлагад манай бөх П.Орхоны талаар мөн дурьджээ.
-Олимпод дөрвөн удаа түрүүлсэн анхны эмэгтэй чөлөөт бөхийн тамирчин болсон. Сэтгэгдэл ямар байна?
-Дөрөв дэх олимпдоо түрүүлсэн гэдэгтээ нэг л итгэж өгөхгүй байсан шүү. Харин одоо медалиа хараад алтан медаль авсандаа итгэж байна. Сэтгэл уужраад сайхан байна.
-Дөрөвхөн секунд үлдээд байхад өрсөлдөгч тамирчнаа ялж, алтан медаль хүртсэн шүү дээ. Барилдааны явцад хэцүү санагдаж байв уу?
-Тэмцээний цагийг хараад найдвар бараг үлдсэнгүй дээ гэж бодсон. Гэхдээ цаг арай дуусчихаагүй байгаа учраас довтлох хэрэгтэй гэж бодож байлаа. Гэтэл өрсөлдөгч маань түрүүлж довтлох үед энэ миний сүүлийн боломж гэж бодон, ялахын төлөө барилдсан.
-Барилдааны дараа өгсөн ярилцлагадаа ялагдахаас айж байсан тухайгаа ярьсан байсан. Ямар учиртай юм бэ?
-Олимпод ялна гэж шууд хэлж чадахгүй байсан учраас тэр. Японыг төлөөлөн Олимпод явах хүсэлтэй ч, явж чадаагүй маш олон чадварлаг бөхчүүд бий. Тиймээс би Японыг төлөөлж байгаа учраас заавал ялах ёстой юм шүү гэсэн нэг төрлийн сэтгэлзүйн дарамт надад байсан.
-Мөн та “хамгийн сүүлд ээж минь надад тусалсан” гэж ярьсан байна билээ. Ээж тань юу гэж хэлэх байсан бол?
-Хамгийн сүүлд ээж минь надад тусалж, би алтан медаль авсан. Ээж минь байсан бол сайн байлаа, баяр хүргэе гэж хэлэх байсан байх гэж бодож байна.
-Энэ жил Монголын бөхөд ялагдаж, ялалтын буухиагаа тасалсан. Магадгүй тэр ялагдал Риогийн олимпоос алтан медаль авахад нөлөөлсөн байх?
-Тийм шүү. Тэр тамирчинтай энэ удаагийн олимпод таарчих юмсан гэж бодож байсан юм. Гэвч өөр хэсэгт хуваарилагдаад, финалд гарч ирж чадаагүй байна билээ. Тэр охины ачаар би чөлөөт бөхийг дахин нэг удаа эргэж харахад хүрсэн. Түүнд талархаж байна.
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
