Финландын баруун өмнөд этгээдийн  Турку хотын зах зээлд гартаа хутгатай гэмт этгээд замаар алхаж байсан явган зорчигчид руу халдсаны улмаас хоёр хүн нас барж, найман хүн шархаджээ. Орон нутгийн цагдаагийн газраас мэдээлснээр эл хэргийг террорист халдлага гэж үзэж, хяналт шалгалтаа эхлүүлсэн байна. Хэргийг 18 настай морокко залуу үйлджээ. Сэжигтэн цагдаагийнханд өгсөн мэдүүлэгтээ “эмэгтэйчүүдийг бүрэлгэх”  зорилготой байсан гэдгээ хүлээсэн байна. Залууг цагдаа нар үйлдэл дээр нь барьжээ. Энэ удаагийн халдлагаар хоёр хүн нас барж, найман хүн гэмтсэний дотор зургаа нь эмэгтэй байсан гэдгийг “Франц пресс” агентлаг мэдээлсэн юм. Хохирогчдын  дунд Итали, Швед, Их Британийн иргэн тус бүр нэг байжээ. Харин үлдсэн хохирогчдын тухайд бүгд финланд хүмүүс байсан байна.

Хэргийн дараа Финланд аюулгүй байдлаа чангатгаж, нисэх онгоцны буудал, галт тэрэгний буудлууд, гудамж талбайд ажиллах цагдаа нарынхаа тоог нэмжээ. Тус улсын Үндэсний аюулгүй байдлын агентлагийн төлөөлөгч “Бид гэмт хэрэгтэн эмэгтэйчүүдийг онилж байсан гэж бодож байгаа. Халдлагаар хохирсон эрэгтэйчүүд бүгд эмэгтэйчүүдээ хамгаалах гэж байгаад шархадсан” гэж ярьжээ.

Цагдаа нар бямба гарагийн үүрээр Турку хотын нийтийн орон сууц, дүрвэгсэд хүлээн авах төвүүдэд тусгай ажиллагаа явуулж, нийтдээ дөрвөн хүнийг энэ удаагийн хэрэгт сэжиглэн баривчилсан байна. Гэхдээ баривчлагдсан хүмүүс хэргийн сэжигтэнтэй холбоотой ч, халдлагатай ямар нэг холбоогүй гэдгээ мэдүүлж байгаа аж.

Хуулийнхан хэргийг үйлдсэн морокко гаралтай 18 настай залууг баривчилсан. Сэжиг­тэн өнгөрсөн жилийн эхээр Финландад дүрвэгчийн статус­тайгаар нэвтэрж байжээ. Түүний нэрийг одоогоор албаныхан нийтэд зарлаагүй, мөн хэрэг үйлдэх болсон шалтгаан нь  ч тодорхойгүй байгаа юм.

Үндэсний мөрдөн байцаах товчооны төлөөлөгч “Бид эм­нэ­лэгт сэжигтэнтэй ярилца­хыг хүссэн ч, тэр юу ч ярихыг хү­сээ­гүй” гэж Франц пресст ярьжээ. Түүний хэлснээр сэжигтэн эдүгээ эмнэлэгт эмчилгээ хийлгэж байгаа юм байна. Тэрбээр баривчлагдах үедээ эсэргүүцэл үзүүлсэн учир гуя хэсэгтээ сумны шарх авч, мэс засал хийлгэсэн аж.

Испанид энэ сарын 17 болон 18-ны өдрийн үүрээр мөн террорист халдлага гарсан. Тус халдлагыг лалын хэт даврагч “Исламын улс” бүлэглэл үйлдсэн гэдгээ хүлээсэн юм. Тиймээс Финландад болсон халдлага тус бүлэглэлтэй ямар нэг холбоотой эсэхийг цагдаа нар шалгаж байгаа аж.  

Испанийн Барселона зэрэг хотуудад өнгөрсөн долоо хоногт хэд хэдэн удаагийн террорист халдлага болж, нийт 14 хүн нас барж, 120 гаруй хүн гэмтэж бэртсэн байдаг. Тус халдлагын сэжигтнүүдийн талаас илүү хувь нь морокко гаралтай хүмүүс байсан тул эдгээр халдлагууд хоо­рон­доо холбоотой байж магад­гүй хэмээн албаныхан үзэж байна. Нийтдээ 5.5 сая хүн амтай Финланд 2015 онд түү­хэндээ хамгийн их буюу 32500 дүр­вэгсдийг хүлээн авсан юм. Гэвч, өнгөрсөн жилээс Европын бусад орнуудтай адил Финланд ч гэсэн дүрвэгсэд хүлээн авах нөхц­лөө чангатгаж,  дүрвэгсдийн нийгэмд учруулах хор хөнөөлийг багас­гах үүднээс хүлээн авах тоогоо 10 мянгаар бууруулсан байна.