Өмнөговь аймгийн Ханбогд суманд хар тамхины нэг төрөл болох мансууруулах үйлчилгээтэй “Ми ми” гэх бодисыг зарсан тохиолдол илэрчээ. Тодруулбал, Өмнөговь аймгийн Ханбогд сумын Цагаан хаднаас Тавантолгойн уурхай хүртэлх зам дагуу үйл ажиллагаа явуулдаг гэр гуанз, буудлуудад “Ми ми”-г худалдах болжээ. Улмаар цагдаагийн байгууллагад энэ төрлийн бодисыг зарж борлуулсан, хэрэглэсэн үйлдэл бүртгэгдэх нь ихэсчээ. Уг бодисыг  зарж борлуулахтай тэмцэх, таслан зогсоох, урьдчилан сэргийлэх чиглэлээр Өмнөговь аймаг дахь Цагдаагийн газар энэ төрлийн бодистой холбоотой 11 үйлдлийг илрүүлэн эрүүгийн хэрэг үүсгэн шалгаж, прокурор, шүүхийн байгууллагад шилжүүлж анхан шатны шүүхээр таван  хэрэг шийдвэрлэсэн байна.

Мөн Мэргэжлийн хяналтын ерөнхий газрын Хүнсний аюулгүй байдлын Үндэсний лавлагаа лабораториор хийлгэсэн 2015 оны долдугаар сарын 22-нд шинжээчийн дүгнэлтээр “Ми ми” гэх бодист Caffeine агуулагдахаас гадна “Fenetylline”, “Penteylline” зэрэг бодис агуулагдаж байгааг илрүүлжээ. Уг дүгнэлтээр тогтоогдсон “Fenetylline бодис нь НҮБ-ын 1971 оны “Сэтгэцэд нөлөөт бодисын тухай” конвенцийн хоёрдугаар жагсаалтад орсонаж.

Харин энэ оны  долдугаар сарын 1-ээс мөрдөгдөж буй шинэчлэн найруулсан Эрүүгийн хуулийн 20 дугаар бүлгийн 20.14 дүгээр зүйлийн 1, 2 дахь хэсэг, шинэчлэн найруулагдаж байгаа Зөрчлийн тухай хуулийн 6.6 дугаар зүйлийн 1, 2, 4.1, 11 дэх хэсэгт... “эм, эмийн түүхий эд” гэж нэмж оруулах санал, танилцуулгыг ХЗДХЯ-д хүргүүлснээр Эрүүгийн хуулийн 20.14.2-т Эм, эмийнтүүхийэд, биобэлдмэл үйлдвэрлэх, импортлох, худалдах, түгээх үйл ажиллагааг зохих зөвшөөрөлгүйгээр явуулсан бол дөрвөн мянга зургаан зуун далан нэгжээс хорин дөрвөн мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ хуульчлагдсан нь Мими гэх бодисын хууль бус эргэлтийг хязгаарлах, эрүүгийн хариуцлага хүлээлгэх эрх зүйн орчинг бүрдүүлсэн юм.

 

Эрүүгийн цагдаагийн албаны Хар тамхитай тэмцэх газраас энэ төрлийн бодисын тархац, хууль бус хэрэглээ, борлуулалтыг илрүүлэх, таслан зогсоох, урьдчилан сэргийлэх зорилгоор нутаг дэвсгэрийн болон хууль хяналтын бусад байгууллагатай хамтарсан хяналт, шалгалтыг явуулж байна.