Өнөөдөр долдугаар сарын 1. Энэ өдөр болмогц хүн бүрийн сэтгэлд 2008 оны долдугаар сарын 1 тодхон буудаг биз ээ.

Есөн жилийн өмнөх тэрхүү хар өдөр  Монголын гэм зэмгүй таван иргэн буудуулан амиа алдаж, 800 гаруй хүн баривчлагдан хатуу хахир  эрүүдэн шүүлтийг амсч, 200  нь яллагдан хэлмэгдэж,  хотын төв хэсэг хар утаанд автсан юм.

2008 оны зургадугаар сарын 30-нд болсон УИХ-ын сонгуулийн дараа эхэлсэн тайван жагсаал эцэстээ хүчирхийлэл, үймээн самуун болж, Монголын түүхэнд “Цуст хар мягмар гараг” нэрээр тэмдэглэгдэн үлдсэн билээ.

Тухайн үед үймээн дэгдээгчид МАХН-ын төв байрыг галдан шатааж, цаашлаад Соёлын төв өргөөний зарим хэсгийг шатааж эхэлсэн бөгөөд тэнд байсан театр, музей болон уран зургийн галлерей зэрэг түүх, соёлын олон үнэт зүйлсийг ул мөргүй шатааж томоохон хэмжээний хохирол учруулжээ.

Есөн жилийн өмнөх энэ л өдөр цаг бусаар хорвоогоос буцсан таван залуугийн халуун амийг хэн ямар зорилгоор бүлгэсэн нь өнөөдрийн хүртэл тодорхойгүй, тэр үеийн цагдаагийн удирдлагууд ял сонссоноор аймшигт хэрэг замхарсан. Гэсэн ч, Монголын ард түмэн санан дурссаар байдаг билээ.

Тэр өдөр зарим хэвлэл мэдээллийн байгууллагад ч том сургамж болсон гэдгийг энд дурьдахгүй өнгөрч болохгүй. Тухайн үед томоохон телевизүүд үймээнийг шууд дамжуулан үзүүлж байсан бөгөөд үйл явдлын шуурхай мэдээ нь үнэн хэрэгтээ үймээнд уриалах хэрэгсэл болсныг мартах учиргүй.