Замын цагдаагийн албаны ЖШУХ-т өчигдөр 335 дуудлага, мэдээ иржээ.

Үүнээс зам тээврийн ослын 265 дуудлага бүртгэгдсэн бөгөөд осол, хэргийн улмаас есөн хүн гэмтжээ.

Мөн зам тээврийн осолд 12-14 насны хоёр хүүхэд өртсөн талаар Замын цагдаагийн албанаас мэдээллээ. Сүүлийн үед зам тээврийн осолд мотоцикльтэй зорчигчид өртөх болсон байна.

Тухайлбал, өчигдөр Нарны гүүрийн баруун замд T.Prius-30 маркийн автомашин Honda маркийн мотоцикльтой мөргөлдсөн хэрэг гарчээ. Ослын улмаас  жолооч 21 настай А гэмтсэн байна. Мөн Архангай аймгийн Их Тамир суманд Kia Bongo маркийн автомашины жолооч Б нь явган зорчигч 78 настай С-г мөргөж амь насыг нь хохироосон хэрэг гарсан аж. Дээрх хэргийг Замын цагдаагийн алба үргэлжлүүлэн шалгаж байна.

Иргэд тэр дундаа залуучууд хоёр болон дөрвөн дугуйт мотоциклийг ихээр унаж хэрэглэх болсон. Зарим иргэдийн хувьд мопед, мотоциклийг тээврийн хэрэгсэл биш гэх буруу бодол ч байдаг. Гэтэл МУ-ын Замын хөдөлгөөний дүрэмд

1. “Механикжсан тээврийн хэрэгсэл гэж мопедоос бусад хөдөлгүүрээр тоноглогдсон бүх төрлийн тээврийн хэрэгсэл,
2. Мопед гэж 50 см3-ээс илүүгүй ажлын багтаамжтай хөдөлгүүр бүхий хоёр буюу гурван дугуйтай, техникийн хурд нь цагт 50 км-ээс ихгүй тээврийн хэрэгсэл,
3. Мотоцикль гэж шаахайтай буюу шаахайгүй хоёр дугуйтай механикжсан тээврийн хэрэгсэл. Энд өөрийн жин нь 400 кг-аас хэтрэхгүй гурав буюу дөрвөн дугуйтай механикжсан тээврийн хэрэгсэл мөн хамаарна” гэж заасан байдаг.

Мөн мотоциклийг 18-аас дээш насны, “А” ангилалтай жолоодох эрхийн үнэмлэхтэй хүн жолоодож замын хөдөлгөөнд оролцох дүрэмтэй юм. Мотоцикльтой замын хөдөлгөөнд оролцогч нь хамгаалах малгай өмсөх, хамгаалах малгай өмсөөгүй зорчигч тээвэрлэхгүй байх үүрэгтэй бөгөөд зориулалтын гишгүүр, зорчигчийн барих бариул байхгүй болсон тохиолдолд тухайн тээврийн хэрэгслийг ашиглахыг хориглосон байдаг.

Улсын хэмжээнд 2017 он гарсаар эхний таван сарын байдлаар мотоцикльтой холбогдсон осол нийт 44 бүртгэгдсэн бөгөөд үүнээс 12 нь нийслэлд, 32 нь орон нутагт үйлдэгдэж, ослын улмаас 12 хүний амь нас хохирч, 32 хүн ямар нэгэн байдлаар гэмтэж бэртсэн талаар Замын цагдаагийн алба мэдээлэв. Тиймээс мотоцикль жолоодохдоо дүрмээ баримтлан бусад хөдөлгөөнд оролцогчдыг хүндэтгэн замын хөдөлгөөндөө соёлтой оролцохыг санууллаа.