БНХАУ-ын Шанхайн нисэх онгоцны буудлаас аялалд гарах гэж байсан зорчигчдын нэг болох 80 настай хөгшин аз хүсэн, онгоцны хөдөлгүүрийн хэсэг рүү зоос шидсэний улмаас онгоц нь хэдэн цагаар саатсан хөгжилтэй, бас хүндхэн явдал болжээ.

Энэ явдал Шанхай Пудон олон улсын нисэх онгоцны буудалд болсон бөгөөд хэргийн эзэн болох настанг  цагдаагийнхан саатуулсан байна. Гэвч, хамгийн харамсалтай нь тэрхүү настнаас гадна 150 орчим Гуанзоу хотыг зорихоор онгоцонд суусан зорчигчдын нислэг нь  төлөвлөсөн хугацаанаасаа таван цагаар хоцорчээ.

Настан онгоцондоо суухаар нисэх буудлын зогсоолд байхдаа есөн ширхэг зоосыг “China Southern Airlines” онгоцны хөдөлгүүр рүү чиглүүлэн шидсэн байна. Гэвч, аюул осолгүй аялахыг хүсэн, аз ерөөж шидсэн есөн зоосны найм нь газарт унасан хэдий ч, нэг зоос нь онгоцны хөдөлгүүр хэсэг рүү оржээ. Үүнийг нь өөр нэгэн зорчигч харж, албаныханд мэдээлснээр онгоцны аюулгүй ажиллагааг шалган, онгоц саатсан байна.  80 настай хөгшин нөхөр, охин, хүргэнийхээ хамт аялж явсан гэнэ.