Монголчууд хэзээний л баярхах дуртай улс. Өвөг дээдсээс уламжилж ирсэн үнэ цэнэтэй хөрөнгөөрөө бахдаж, ойр орчмын хүмүүстэй гайхуулж суух нь энүүхэнд. Гэхдээ орчин үед эд хөрөнгөө олон нийтэд ил гаргаж, баярхах хэрэггүй болжээ. “Түрүүлж дуугарсан хөхөөний ам хөлдөнө” гэдэг дээ.

Эд хөрөнгөө гэрт нь зочилсон хүн болгонд зарлах нь өөрийгөө хулгайч нарын бэлэн зууш болгож байна гэсэн үг. Нэгэн жишээ дурьдахад, энэ сарын 13-нд Хэнтий аймагт оршин суух нэгэн иргэний гэрт хулгай орж, 400 сая төгрөгийн үнэтэй “Сармагчин дүртэй бурхан”-ыг дээрэмдсэн хэрэг гарсан билээ. Уг бурхан нь XV-XVI зууны үед урласан бөгөөд эд баялаг, аз жаргал, амжилт авч ирдэг заан толгойт бурханы хувилгаан бичин дүрт бурхан гэнэ.

Сармагчин дүрт бурханыг хохирогчийн гэр бүлийнхэн 400 гаруй жилийн өмнөөс удам дамжин шүтэж ирсэн бөгөөд Монголд тун ховор байдаг талаар цадаагийн газарт мэдүүлсэн байдаг.  Азаар цагдаагийн албан хаагчид шуурхай ажиллаж, гэмт этгээдүүдийг илрүүлж, бурханыг эздэд нь хүлээлгэн өгсөн.

Гэвч энэхүү хэрэг гарах болсон шалтгаан нь гэрийн эзэд өөрсдөө гэхэд болно. Уг хэргийг үйлдсэн гэмт этгээдүүд хохирогчийн гэрт өвөг дээдсээс уламжлан ирсэн үнэтэй бурхан байдаг гэдгийг хүнээс сонссон учраас зохион байгуулалттайгаар үйлдсэн гэх мэдээлэл ч тухайн үед гарсан юм.

Хамгийн сүүлийн жишээг дурьдахад ийм байна. Өөрийнхөө амнаас болж хулгайч нарын бай болсон хэрэг үүгээр дуусахгүй. Ялангуяа манай улсын олны танил эрхмүүд телевизийн нэвтрүүлэг, сонины ярилцлагад орохдоо өөрийнхөө үнэт цуглуулга, өвөг дээдсээс уламжилж ирсэн эд хөрөнгөө зарлах нь бий. Үүнээс болж хулгайчдын нүдэнд өртөж, эд хөрөнгөө алдсан эрхмүүд цөөнгүй.

Өнгөрсөн оны нэгдүгээр сард хэвлэл, мэдээллийн хэрэгслээр гарсан “Солонгосын зартай хулгайч "Гацуурт"-ын Л.Чинбат, Л.Гүндалай нарын гэрээс үнэтэй бурхан хулгайлжээ” гэх гарчигтай мэдээлэл одоо ч хуучраагүй байна. Хэргийн талаар эргэн сануулахад, БНСУ-ын иргэн зартай хулгайч Пак гэгч этгээд Нүхтийн амны зургаан айлд орж, алтан бурхан, соёлын хосгүй үнэт эдлэлийг хулгайлж, тэрбум гаруй төгрөгийн хохирол учруулсан билээ.

Энэ мэтчилэн амнаасаа болж, хулгайч нарын золиос болсон үйл явдал олон. Тиймээс ойр орчмын хүмүүстэй өөрийнхөө эд хөрөнгийн талаар баярхах хэрэггүй юм байна шүү. Нэг үгээр хэлбэл, баярхах гэдэг зан чанарыг өнгөрсөн зуунд нь үлдээ. Баярхмаар байсан ч эд хөрөнгөөрөө баярхах шаардлага алга.

Эс бөгөөс хулгайч нарын бэлэн зууш болж л дуусах нь байна. Орчин цагийн хулгайч нар судалгаа тооцоотой, нарийн зохион байгуулалттайгаар гэмт хэрэг үйлдэх болсон учраас алтан бурхантай байсан ч амаа тас жимийгээд л өнгөрдөг цөвүүн цаг ирсэн байна шүү, хөрөнгөтөнүүд минь.