Удахгүй элсэлтийн ерөнхий шалгалт болох гэж байгаа. Энэ л үед хүүхэд залуус ирээдүйд ямар мэргэжилтэй болох вэ гэдгээ сонгодог. Тэр дундаа “Багш шигээ сайн багш болно” гэдэг нандин мөрөөдөл цөөнгүй сурагчдад бий. Харамсалтай нь өнөөдөр манай улсын бүх шатны боловсролын байгууллагад багшлах боловсон хүчний нөөц төдийлөн хангалттай биш. Тэр дундаа манай улсын өнцөг булан бүрт ерөнхий боловсролын сургуулийн бага ангид багшлах 7800 хүний нөөц хэрэгтэй байгаа аж. Нөгөөтэйгүүр, багш болох чин хүсэл эрмэлзлэлтэй, сурлага сайтай ч ар гэрийн боломж тааруу байх тохиолдол ч бий. Ийм нөхцөл байдлыг судалж үзээд багш болох чин хүсэлтэй хүүхдүүдэд нэгэн сайхан боломжийг МУБИС, МҮОНР хамтран зохион байгуулсан  “Радио конкурс” уралдаант нэвтрүүлгээрээ олгосон юм. Өнгөрсөн хоёрдугаар сараас эхэлсэн “Радио конкурс” уралдаант нэвтрүүлгийг Хэнтий аймгийн Биндэр сумын Ерөнхий боловсролын сургуулийн 12 дугаар ангийн сурагч А.Минжинсор тэргүүлж, Архангай аймгийн Батцэнгэл сумын Ерөнхий боловсролын сургуулийн 12 дугаар ангийн сурагч Д.Нямдулам хоёрдугаар байранд оржээ.

МҮОНР-ийн Хүүхэд залуучуудын редакцийн продюссер Ц.Сосорбурам “Уралдаант нэвтрүүлэгт идэвхтэй оролцсон нийт хүүхдүүддээ баяр хүргэе. “Радио конкурс” уралдаант нэвтрүүлэгт түрүүлсэн сурагчийг МУБИС-д элсэн сурах урилгаар шагналаа. Мөн эхний нэг жилийн сургалтын төлбөрөөс 100 хувь чөлөөлөгдөх эрхийг олгож байна. Харин II байранд орсон хүүхдийг эхний нэг жилийн төлбөрөөс 50 хувиар чөлөөлж, мөн урилгаар тус сургуульд элсэн суралцах эрхийг олгож байгаа юм. Үүнээс гадна уралдаанд идэвхтэй оролцсон 15 хүүхдэд босго оноогоо давчихвал энэ сургуулийн дуртай ангиа сонгон суралцах эрхийг олгож батламж гардууллаа. Багш хүн бол сурган хүмүүжүүлэгч, сэтгэл судлаач байдаг. Хүүхдийг эрдэм мэдлэгтэй хүн болгохоос гадна гараас нь хөтөлж хүн болгох адармаатай хэр нь аз жаргалтай эрхэм үйлсийн эзэд байдаг учраас багш болох хүн завсар зуурын сонирхлын журмаар энэ мэргэжлийг сонгоно гэдэг нь өрөөсгөл, учир дутагдалтай. Тиймээс манай хоёр байгууллага ярилцаж хэлэлцээд ерөөсөө хөдөө, орон нутагт ч бай, хот, суурин газарт ч бай багш дутагдалтай газарт багш болох чин хүсэл эрмэлзлэлтэй хүүхдүүдийг л энэ уралдаанаар олж илрүүлж, сонгон шалгаруулах зорилго тавьсан юм. Бид 10-аад жилийн өмнө “Радио конкурс” уралдааныг Санхүү, эдийн засгийн сургуультай хамтран зохион байгуулж байлаа. Тухайн үед гурван хүүхдэд тус сургуульд элсэн суралцах эрх олгож байсан.

Харин өнөөдөр багш болох туйлын хүсэл, чин сэтгэлтэй хүүхдүүдийг олж нээн мөрөөдлийг нь биелүүллээ. Хүүхдүүдэд хувь заяагаа шийдэх ийм сайхан боломж олгоно гэдэг бол ирээдүйн багш нарын амьдралын замналыг нээж өгч буй сайхан гарц юм” гэлээ.

“Радио конкурс” Монгол орон даяар зарлагдаж 18 аймгийн төв, сум суурин төдийгүй нийслэл хотын Ерөнхий боловсролын сурагчид ч идэвхи чармайлттай оролцжээ. МҮОНР ч хүртээмжтэй хүрч, шууд нэвтрүүлгээр хүүхдүүдийн бодит, бүтээлч оролцоог дэмжиж, тэдэнд байж болох бүхий л боломжийг олгосон юм байна.

Цагаа олсон тус нэвтрүүлэгт ахлах ангиа төгсч байгаа болон багш болох чин хүсэл, эрмэлзлэлтэй, авьяас сонирхолтой 120 гаруй хүүхэд оролцжээ. Тэднээс 90 гаруй нь ахлах ангийн сурагч байв.

МУБИС-ийн Хөтөлбөрийн нэгдсэн албаны оюутан хариуцсан мэргэжилтэн Т.Ариунжин “Эрдэмтэн багш нарын баг ажиллаж “Радио конкурс” уралдаант нэвтрүүлгийн асуулт, даалгаврыг боловсруулсан. Нэвтрүүлгийн эхний 10 минутад асуултаа задалж, сүүлчийн 10 минутад албан ёсны хуудсаараа дамжуулан хариултаа авч, зөв хариулт, хүүхдүүдээс гарсан санал хүсэлтийг тухай бүрт нь бүртгэлжүүлж ажилласан. Мөн МУБИС 2018-2019 оны хичээлийн жилд ямар хөтөлбөрөөр хичээллэж, ямар мэргэжлээр элсэлт авах вэ гэдэг мэдээллийг байнга өгч байсан. Үүнээс гадна Монгол Улсын Засгийн газрын 70, 100 хувийн тэтгэлэгт хөтөлбөрийг хэрхэн авах вэ, МУБИС-ийн захирлын 50 хувийн тэтгэлэгт хөтөлбөр, эрэгтэй оюутны 50 хувийн тэтгэлэгт хөтөлбөрт яаж хамрагдах вэ. Цаашилбал, кредитийн олон хөтөлбөр бий. Үүнд хэрхэн хамрагдах боломжтой вэ гэдэг мэдээллийг өгсөн. Мөн ахмад багш нарын зөвлөгөөг ч сурагчиддаа хүргэж амжлаа” гэв.