Их Британийн цагдаагийн газраас өчигдөр шөнө Лондонгийн төв хэсэгт том хэрэг гарсан тухай мэдэгджээ. Лондонгийн гүүрэн дээр  ачааны автомашин явган хүний замаар алхаж явсан хүмүүсийг дайрсан байна. Тэгвэл үүний дараахан буюу 22:00 цагийн үед “BBC”-ын сэтгүүлч Холли Жонс “Гэмт этгээдийн машин цагт 50 миллын хурдтай явган хүний зам дээгүүр давхисан. Одоогоор дайруулсан таван хүнд тусламж үзүүлж байна. Цагдаа нар яг одоо Тэймс мөрөнд ямар нэг зүйл хайж байна” хэмээн дамжуулжээ.

Мөн “Спектатор” сэтгүүлийн эрхлэгч Уилл Хийвен твиттертээ “хоёр хүн гэмтсэн байна. Нэг нь явган хүний зам дээр, нөгөө нь автозамын хажууд” гэж жиргэн, гүүрэн дээр зэвсэглэсэн цагдаа ажиллаж байгааг мэдээлжээ.

Харин цагдаагийн газраас 23:20 цагт албан ёсны мэдэгдэл хийв. Тус мэдэгдэлд “Лондонгийн гүүрний урд талын “Borough” захын орчимд ч гэсэн хутгатай этгээд олон хүнийг шархдуулсан хэрэг гарлаа. Зэвсэгтэй цагдаа нар ажиллаж байгаа. Буун дуу гарах чимээ ч сонсогдсон” тухай дурьджээ.

Их Британийн Ерөнхий сайд Тереса Мэй ч мэдэгдэл хийлээ. Тэрбээр Лондонд болсон энэхүү цуврал гэмт хэргийг “Террорист халдлага” байх магадлалтай гэж үзэж буйгаа илэрхийлсэн байна. Харин өнөөдөр өглөө үүрээр цагдаагийнхан “хэрэг террорист халдлага мөн” гэж мэдэгджээ.

Одоогоор гэмтэж бэртсэн 20 гаруй хүн ойролцоох зургаан эмнэлэгт хуваагдсан хүргэгдсэн байна.

Орон нутгийн зарим хэвлэлд бичсэнээр, энэ удаагийн цуврал халдлагыг таван жихад үйлдсэн бөгөөд тэд гэмт хэрэгтээ цагаан өнгийн ачааны машин, 12 инч урт хутга ашигласан аж. Мөн “Аллах бурхны төлөө” хэмээн хашгирч байсан гэнэ. Мөн долоон хүн нас барсан гэх мэдээлэл ч байна.