Төрийн захиргааны төв байгууллага цаашлаад салбар яамны харьяа агентлаг, хэлтэс албадууд хуваарийн дагуу иргэдэд нээлттэй үйлчилж, Төв талбайд нээлттэй хаалганы өдөрлөг зохион байгуулж байгаа билээ. Тэгвэл өнөөдөр  Зам, тээврийн хөгжлийн яамны "Нээлттэй хаалганы өдөрлөг" Сүхбаатарын талбайд эхэллээ.

Хоёр өдөр үргэлжлэх энэхүү өдөрлөгөөр автотээвэр, автозам, агаарын тээвэр, төмөр замын салбарт нэвтэрч буй шинэ техник, технологи, шинэ үйлчилгээ, хийж хэрэгжүүлэх төсөл хөтөлбөрийн талаар танилцуулах юм. Мөн тээврийн хэрэгслийн шилжилт хөдөлгөөн хийх, улсын дугаар шинээр олгох ба нийтийн тээврийн цахим төлбөрийн систем, U-money картыг борлуулах аж.

Мөн өнөөдөр нэгэн сонирхолтой үйл явдал болж байгаа нь хуучны “ногоон царцаа” буюу АН-2 онгоцны шинэчилсэн загварыг Монголд  үйлдвэрлэх талаар мэдээлэл хийхээр болжээ. Тодруулбал, АН2-ийг Монголд ийм болгож үйлдвэрлэнэ гэж танилцуулах зорилгоор шинэ загвар болох ТВС-2МС онгоцыг өнөөдөр Монголд авчирч байгаа аж.

12.30-д танилцуулах онгоц буух бөгөөд нисэх буудал дээр уг онгоцыг буухад Монголд онгоц үйлдвэрлэх төсөл хэрэгжүүлэх гэж байгаа нисэхийн салбарын удирдлага болон инженер техникийн хүмүүс мэдээлэл өгөх юм байна.