МАХН-ын Бага чуулган өчигдөр хуралдаж ХҮН-ын дарга асан, Дархан-Уул аймгаас УИХ-д сонгогдож байсан экс гишүүн С.Ганбаатарыг Ерөнхийлөгчид нэр дэвшүүлэхээр болсноо зарласан билээ.

Дотоод сонгуульд дөрвөн нэр дэвшигчтэй өрсөлдөж 65 хувийн саналаар нэр дэвшихээр болсон С.Ганбаатар хэдийгээр өөр намынх ч гэсэн “МАНАН-г ялахын тулд МАХН-ын өмнөөс нэр дэвших болно” хэмээн зарласан юм.

Тэгвэл С.Ганбаатар нэр дэвшигчийг өчигдөр Улсын хоёрдугаар төв эмнэлгийн нарийн мэргэжлийн эмч нар үзэж, улмаар өчигдөр шөнийн 24.00 цагаас өмнө амжиж СЕХ-д бичиг баримтаа хүлээлгэн өгчээ. Мөн бичиг баримтаа цуглуулж өгснийхөө дараа сэтгүүлчдэд ч мэдээлэл хийгээд амжсан юм.

Тэгвэл СЕХ өнөөдөр нэр дэвшигч С.Ганбаатарыг бүртгэх эсэх асуудлаар хуралдах юм байна. Улмаар бүртгэх эсэх шийдвэр гарсны дараа буюу 16.00 цагт гурван намын нэр дэвшигчийн нэрийг эцэслэн олон нийтэд зарлаж, үнэмлэх олгох аж.

Ерөнхийлөгчийн сонгуулийн хуульд заасны дагуу өнөөдөр нэр дэвшигчдийг олон нийтэд эцэслэн зарлах учиртай. Мөн өнөөдөр МАХН-ын гаргасан шийдвэрээс болж УИХ-ын гишүүн О.Баасанхүү намаасаа гарч магадгүй гэдгээ мэдэгдсэн. Энэ тохиолдолд МАХН нэр дэвшигч тодруулах эрхээ алдаж магадгүй билээ.