АНУ-ын Ерөнхийлөгч Доналд Трамп ОХУ-д тагнуулын нууц мэдээлэл задруулсан тухай орон нутгийн өдөр тутмын хэвлэл мэдээлж, дуулиан шуугиан тарьж эхэллээ. Тус улсын “Вашингтон пост” сонины даваа гарагийн дугаарт Ерөнхийлөгч Доналд Трамп өнгөрсөн долоо хоногт Цагаан ордонд ОХУ-ын Гадаад хэргийн сайд Сергей Лавров, ОХУ-аас тус улсад суух Элчин сайд Сергей Кислайк нарыг хүлээн авч уулзахдаа хэт даврагч Лалын улс бүлэглэлтэй холбоо бүхий маш нууц мэдээллийг задруулсан тухай мэдээлэл нийтлэгджээ. Ингэхдээ нэрээ нууцалсан АНУ-ын эрх бүхий албан тушаалтны ярилцлагаас иш татсан байна. Тодруулбал,  тус нийтлэлд нэрээ нууцалсан эх сурвалж “Ерөнхийлөгч Доналд Трамп зарим холбоотон орнуудынхаа эрх баригчдад ч хэлээгүй нууц мэдээллээ ОХУ-ын Элчин сайдад задруулсан” хэмээн ярьсан байна.

Түүний хэлснээр, Гадаад хэргийн сайд Сергей Лавров, Элчин сайд Сергей Кислайк нар АНУ-ын Тагнуулын байгууллагын дүн шинжилгээ хийж боловсруулсан төрийн онц нууцад хамаарах баримт мэдээллийг уулзалтын үеэр Д.Трампаас авч, нутаг буцсан гэнэ.

Мөн нийтлэлд хэд хэдэн эх сурвалжийн эшлэлийг нийтэлсэн байх бөгөөд тэдний дунд “Трамп баримтын эх хувийг гаргаж, нисэх онгоцонд зөөврийн компьютер ашиглахтай холбоотой хэт даврагч бүлэглэлийн сүрдүүлгийн талаар дэлгэрэнгүй ярьж эхэлсэн” гэх мэдээлэл ч байх юм. Үнэн хэрэгтээ дээрх нууц мэдээллүүд зөвхөн АНУ-ын холбоотон улсуудад л хамаарах бөгөөд ОХУ-ын Засгийн газарт задруулах шаардлагагүй байсан гэнэ. Хэрэв тэдгээр мэдээлэл нийтэд ил болбол, тагнуул болоод терроризмын эсрэг хамтын ажиллагааны амин чухал итгэлцэл алдагдах эрсдэлтэй гэдгийг онцолжээ.

Тэгвэл “Вашингтон пост” сонины  нийтлэлийн мөрөөр Цагаан ордноос мэдэгдэл хийж, дээрх мэдээлэл ор үндэслэлгүй хэмээн няцаалт хийгээд амжсан байна.

Тодруулбал, Ерөнхийлөгчийн Үндэсний аюулгүй байдлын асуудал эрхэлсэн зөвлөх Х.Р.МакМастер, Төрийн нарийн бичгийн дарга Рекс Тиллерсон нар мэдэгдэл хийсэн байна. Тэд Ерөнхийлөгч Д.Трамп ОХУ-ын Гадаад хэргийн сайд Сергей Лавровтой уулзалт хийх үеэрээ нисэх онгоц руу чиглэсэн террорист байгууллагын аюул занал, сүрдүүлгийн тухай ярьсан гэдгийг хүлээн зөвшөөрсөн хэдий ч, “Өнөөдрийг хүртэл олон нийтэд ил болоогүй тагнуулын байгууллагын нууц баримт материал, мэдээлэл цуглуулах арга техник, цэргийн стратегийн талаар нэг ч үг дурсаагүй” хэмээн няцаажээ.
АНУ-ын сөрөг хүчнийхэн өнөөгийн Ерөнхийлөгч Доналд Трампыг ОХУ-тай холбоо хамааралтай хэмээн харддаг. Түүнчлэн, өнгөрсөн жилийн арваннэгдүгээр сард болсон Ерөнхийлөгчийн сонгуульд ОХУ-ын хакерууд зориудаар нөлөөлж,  улс төрийн туршлагагүй бизнесмэн эрийг ялалт байгуулахад дэмжлэг үзүүлсэн гэх байр суурийг илэрхийлдэг юм.