Миссиссиппи их сургуулийн эмчилгээний төв кампусаас хамгийн багадаа 7000 хүний цогцос олджээ. Тус кампус нийтдээ 164 акр газрыг хамрах бөгөөд энэ удаа олдсон оршуулга бараг 20 акр талбайг хамарчээ.

Тэдгээр оршуулга хэнийх болох нь одоогоор тодорхойгүй байгаа ч, албаныхан 1855 онд анх нээгдэж байсан төрийн өмчит анхны сэтгэл мэдрэлийн эмнэлгийг өвчтөнүүдийнх байж магадгүй хэмээн таамаглаж байна. Сэтгэл мэдрэлийн эмнэлэг 1935 онд хаагдсан бөгөөд түүнээс 20 жилийн дараа тухайн газарт Миссиссиппи их сургууль үүдээ нээж байжээ.

Миссиссиппигийн их сургуулийн кампуст өнгөрсөн 2014 онд барилгын ажил эхэлж, тухайн үед 80 орчим цогцос олдож байжээ. Тэдгээр цогцоснууд ижил хэмжээ, материал бүхий хувцсыг өмсүүлсэн нь сонирхол татаж байсан тухай сургуулийн тэмдэглэлд бичсэн байна. Улмаар удалгүй дахин 1000 цогцос олджээ. Улмаар цааш тоо нь улам олширсоор эдүгээ бүр 7000-д хүрсэн байна.

Цаашдаа олдсон цогцсыг ухаж гаргах, дахин оршуулах зэрэгт хүн тус бүрээр 3000-25000 ам.доллар шаардлагатай болох гэнэ.