Монгол Улсаас Буриад улсын Улаан-Үд хотод суралцаж байсан оюутан бүсгүй сургуулийнхаа дотуур байрны жорлонд хүүхдээ төрүүлж, улмаар төрөхийн хүндрэлээс болж ухаан алдахдаа төрүүлсэн үрээ дарсан хэрэг гарсан талаар www.baikal-daily.ru/news сайтад мэдээлжээ. Тэрбээр, 17 настай бөгөөд 2016 онд тус улсад суралцахаар очсон байжээ.

Энэ сарын 3-ны өдөр 16.00 цагийн орчимд бие засахаар дотуур байрны өрөөнөөсөө гарсан аж. Улмаар нэг цаг орчмын хугацаа өнгөрсний дараа дотуур байрны харуул нийтийн бие засах газарт ороход цус үзэгдсэн байна. Ингээд цоожтой хаалгыг онгойлгож ороход охин ухаан алдсан байсан аж.

Хүүхэд амьд мэнд төрсөн ч харамсалтай нь ээж нь ухаан алдахдаа хүүхдээ дарж унасан учраас бүтэж амиа алджээ. Охин одоо эмнэлгийн тусламж авч байгаа ч биеийн байдал сайнгүй байгаа гэнэ. Хэргийг Улаан-Үд хотын цагдаагийн газар шалгаж байгаа бөгөөд охин орос хэл сайн мэдэхгүй зэрэг бэрхшээлтэй асуудал гарч байгаа аж.

Түүнтэй хамт нэг өрөөнд амьдардаг монгол охид болон багш нар нь жирэмсэн гэдгийг нь мэдээгүй хэмээн ярьжээ. ОХУ-ын Эрүүгийн хуулийн 106 дугаар зүйл “Төрүүлсэн хүүхдээ эх нь хөнөөх” гэдэг зүйл ангиар эрүү үүсгэн шалгаж байна гэж Оросын Мөрдөн байцаах хорооны Буриадын Мөрдөн байцаах газар мэдээлсэн бөгөөд үхлийн шалтгааныг тогтоохоор дөнгөж төрсөн нярайд задлан шинжилгээ хийж байгаа юм байна.

Б.Тогтох