Ардчилсан Намын нарийн бичгийн дарга асан О.Магнай болон нарийн бичгийн дарга С.Эрдэнэболд нар өнөөдөр намын байрандаа цаг үеийн асуудлаар мэдээлэл хийлээ. Тэд МАН-ын дарга М.Энхболд Ерөнхийлөгчийн сонгуулийн сурталчилгаа албан ёсоор эхлээгүй байхад сурталчилгаа хийсэн, долоо төрлийн татвар нэмсэн гэх мэт асуудлыг хөндсөн юм.

Мэдээллийн эхэнд АН-ын нарийн бичгийн дарга асан О.Магнай “УИХ-аар концесстэй холбоотой асуудал батлагдаж гарсан. Долоон концессын нийт хэмжээ 744 тэрбум 90 сая төгрөг.  Эдгээр концессын гэрээнүүд хийгдэхэд бэлэн болоод байгаа. Нэр бүхий хүмүүс концессын гэрээ зурж байгаа талд байна гэдэг нь нууц биш болсон. Ардчилсан нам үүнийг хулгай ил цагаандаа гарлаа гэж үзэж байна. Засгийн газрын гишүүд нь засгийн газартайгаа гэрээ хийж концесс авна гэдэг чинь байж боломгүй үйлдэл” хэмээн мэдэгдсэн юм.

Мөн “Тун удахгүй ерөнхийлөгчийн сонгууль болно. Хуулиар сонгуулийн сурталчилгаа 21 хоногийн өмнө эхлэх ёстой гэж заасан. Гэвч УИХ-ын дарга М.Энхболд 10 гаруй телевизээр "Бүрэн зураглал" нэртэй нэвтрүүлгийг хийлгэн цацаж, 2 тэрбум төгрөгийн зардал гаргасан сонгуулийн сурталчилгаа хийлээ. 

МАН-ын байдлаас харахад,  өнгөрсөн сонгуулийн бөхийн холбооноос хүн дэвшүүлсэн энэ удаад уяачдын холбооноос хүн дэвшүүлэх нь гэсэн сэтгэгдлийг төрүүллээ. АН-ын зүгээс энэ асуудлаар Сонгуулийн Ерөнхий Хороонд хандана. Шударга шүүх гэж байдаг юм бол УИХ-ын дарга М.Энхболд нэвтрүүлэг цацаж сурталчилгаа хийснээр нэр дэвших эрхээ хасууллаа гэж дүгнэж байна” хэмээн мэдэгдсэн юм. 

Түүний дараа  Ардчилсан Намын нарийн бичгийн дарга С. Эрдэнэболд татвартай холбоотой асуудлаар байр сууриа илэрхийлсэн. Тэрбээр “Өнөөдөр Монголын түүхэнд хар будгаар тэмдэглэгдэх өдөр болж байна. Учир нь эрх баригч нам бодлогоор нийгмийн дундаж давхаргын амьжиргаанд ноцтойгоор халдлаа. 4 сарын 14-ний өдөр долоон төрлийн татвар нэмсэн. ОУВС-аас татвар нэмэхийг шаардаж байгаа гэж эрх баригчид тайлбарласан.

Гэтэл ОУВС-ийн Монгол дахь суурин төлөөлөгч Нийл Сакерын сонинд өгсөн ярилцлагаар бол ямар зардлыг танах эсэх нь засгийн газрын өөрийнх нь асуудал гэсэн байгаа юм. Өөрөөр хэлбэл ОУВС-аас татвар нэм гэж хэлээгүй гэдгийг тэрээр тодорхой илэрхийлсэн байна.  Монголчуудын дундаж давхаргын амь амьдралаа залгуулж байгаа машин нь 10-аас дээш жилийн насжилттай машин гэдэг судалгаа гарсан. 

Татвар нэмэхгүй байх талаар төрийн захиргааны албан хаагчдын шаардлагыг хүргүүлсэн. Гэтэл эрх баригчид мэргэжлийн хүний, судлаачдын үгийг сонсохгүй байгаа. АН-ын зүгээс үндэслэлгүй, судалгаагүй татвар нэмж байгаа явдлаа дахин нэг харахыг эрх баригчдаас шаардаж байна" гэв.