2016 оны сонгуулиар бүлэг байгуулах хэмжээнд л ялалт байгуулсан АН-ынхан удирдлагууддаа хариуцлага тооцох ёстой хэмээн ялагдсаныхаа маргаашнаас ярьж эхэлсэн. Өчигдөр гэхэд л намын дэргэдэх Шинэчлэлийн түр хорооны залуус АН-ын даргыг 24 цагийн дотор ажлаа хүлээлгэж өгөхийг шаардсан билээ.

Тэгвэл өнөөдөр АН-ын Гүйцэтгэх зөвлөл хуралдаж АН-ын дарга З.Энхболдыг албан тушаалаас нь буулгажээ. Мөн Ерөнхий нарийн бичгийн даргын үүрэг гүйцэтгэгч Л.Эрхэмбаяр ч хариуцлагаа үүрэх аж.

АН-ын ҮЗХ-ны хуралдаан энэ сарын 18-нд болох бөгөөд тус хуралдаанаар АН-ын дараагийн дарга хэн байх вэ гэдгийг шийдэх юм байна. Тэгвэл АН-ынхан ҮЗХ-ны хуралдаан хүртэл Аж үйлдвэрийн сайд, УИХ-ын гишүүн Д.Эрдэнэбатыг түр намын даргаар томилжээ. Мөн АН-ын бүлгийг УИХ-ын гишүүн С.Эрдэнэ удирдах бол УИХ-ын дэд даргаар Я.Санжмятав, АН-ын бүлгийн дэд даргаар Б.Пүрэвдорж, Ж.Батзандан нар суухаар болсон байна.

Д.Эрдэнэбат нь 2012 онд намын Ерөнхий нарийн бичгийн даргаар ажиллахдаа намаа ялалтад хүргэж, улмаар АН-ын бүлгийн дарга, сүүлийн хоёр жил Аж үйлдвэрийн яамыг амжилттай удирдаж яваа зангарагтай улстөрч юм. Тиймдээ ч албан ёсны бус ч энэ томилгоонд АН-ын жирийн гишүүд дэмжигчид сэтгэл хангалуун байгаа юм.