“Оддын цаг” буландаа нэрт жүжигчин Самуэль Жексоны “cinematoday.jp” сайтад өгсөн товчхон ярилцлагыг орчуулан хүргэж байна. Тэрбээр шинэ уран бүтээл  “Kong: Skull Island” киноныхоо талаар болон хамтран ажилласан жүжигчдийнхээ  талаар ярьжээ. Тус кино “Тэнгис” кино театрын дэлгэцнээ үзэгчдэд хүрч байгаа билээ.

-Самуэль таныг “Кинг конг”-ын үнэнч шүтэн бишрэгч байсан гэж сонслоо?

-Тийм ээ. Хүүхэд байхдаа Конгоос зугтаж буй хүмүүсийг дуурайж, мангас гарч ирдэг тоглоом тоглох тун дуртай  байлаа. Кинг конг, тэр дундаа нэг хэсэг бий. Одоо ч гэсэн санаанаас гардаггүй юм. Конг Эмпайр стэйт Бюлдингийн орой руу авирч, хажуугаар нь нисэлдэн өнгөрөх онгоцуудыг гараараа цохиж буй хэсэг байдаг даа. Тэр миний Конгийн талаархи хамгийн тод дурсамжийн нэг.

-“Kong: Skull Island” кинонд Том Хиддлтонтой хамтарч тоглосон. Түүнтэй хамт нэг уран бүтээлд ажиллах ямар байв даа?

-Хөгжилтэй байсан. Том уг нь их царайлаг залуу шүү дээ /инээв/. Түүнийг залуу, царайлаг байхад бид “Авенжерс” кинонд хамтран тоглож байсан юм. Тэр үед Том төмөр дуулга өмсч, ногоон нөмрөг зүүчихнэ. Бидний хамт гарсан үзэгдэл нь Локиг торонд хорьдог тэр хэсэг л байсан. Бусад үед хамтдаа нэг зурагт орсон тохиолдол бараг байхгүй. “Kong: Skull Island” кинонд ч гэсэн үүнтэй яг ижил. Томын дүр нь аралд явж байхад би наана нь байх жишээтэй. Тодорхой нэг газарт уулздаг ч гэсэн дандаа хамтдаа байх дүрүүд биш байлаа.

-Цаг хугацааг нь авч үзвэл “Кинг конг” кино “Apocalypse Now” зэрэг дайн тулааны сэдэвт кинонууд шиг гайхамшигтай болж чадсан юм шиг санагдсан. Цэргийн хүний дүрд тоглосон Сэмуэлийн хувьд энэ тал дээр ямар бодолтой байна вэ?

-Манай кино группынхан цэргийн армид зөвлөхөөр ажилладаг эрхмүүдтэй киноны зураг авалтаас өмнө уулзаж ярилцсан юм. Тэгэхдээ өмнө нь цэргийн ахмад, хошууч гэх мэт цол дэвтэй хүний дүрийг бүтээж байсан учраас миний дүрийн чиг үүрэг нь ерөнхийдөө бусдыгаа манлайлах гэдгийг ойлгож байсан. Бас нэг нэгэндээ эцсээ хүртэл үнэнч зүтгэдэг гэдгийг нь мэднэ.

Цэргийнхэн хүч чадалтайн дээр хамгийн хэцүү нөхцөл байдлыг ч даван гарч чаддаг улс. Тиймээс “Apocalypse Now”-ыг дүрийн судалгаандаа ашигласангүй. Гэхдээ түүнээс илүү дэслэгч, хурандаа Паккард гэх хүний дүрийг бүтээхдээ “Моби Дик”-ийн “Пекод” хөлгийн ахмад Ахавыг төлөөлүүлэн бодсон. Өөрийнх нь өрөөсөн хөлийг булаасан “Моби Дик” гэх аварга халимны араас цуцалтгүй хөөцөлдөж буй тэр дүр төрх нь Конгоор бол яг л Паккардтай адилхан мэт санагдсан юм.

-Таны хувьд эсрэг талын дүртэйгээ огт харьцахгүйгээр жүжиглэх ямар байв даа?

-Төсөөлөн бодох чадвар сайтай учраас гайгүй. Ном их уншдаг, кино ч үздэг учраас тэр. Энэ төрлийн чадвар сайтай бол огт байхгүй зүйлийг байгаа мэт болгон жүжиглэж чадна. Мэдэхгүй хүн харвал эрүүл бус хүн мэт /инээв/.

-Найруулагч Жордан  Вогт Робертстой анх удаагаа “Kong: Skull Island” кинонд хамтран ажилласан гэсэн. Энэ талаархи  таны сэтгэгдэл?

-Найруулагчийг тун авьяастай гэж боддог. 80 настай буурлаас найман настай балчир хүртэлх бүхий л чиглэлийн баялаг туршлагатай жүжигчдээр баг бүрдүүлж, тэдэнтэйгээ ч сайтар ойлголцож чаддаг. “Kong: Skull Island” шиг кинонд ч хүний зан характерыг харуулж чадах нүдтэй. Тийм учраас огт байхгүй зүйлийг байгаа мэтээр харуулж, дүрийг бодит мэтээр үзүүлж чадсан гэж бодож байна.