Тайванийн эрх баригч Ардчилсан Прогрессив намын гишүүн энэ сарын дундуур БНХАУ руу очоод сураггүй алга болжээ. Энэ талаар БНХАУ-ын Засгийн газраас мэдээлсэн бөгөөд “Үндэсний  аюулгүй байдалд заналхийлэхүйц үйл ажиллагаанд оролцсон байж магадгүй” гэж үзэн мөрдөн шалгаж эхэлсэн байна.

Сураггүй алга болсон эрхмийг Ли Мин Че гэх бөгөөд Тайванийн эрх баригч намын гишүүнээр ажилладаг байжээ. Мөн БНХАУ-ын хүний эрхийг дэмжигч байгууллагад харьяалагддаг байсан гэнэ. Гэвч энэ сарын эхээр Хятад, Макаогийн хилийн орчимд Зухай хотод ирснийхээ дараа тодорхойгүй шалтгааны улмаас ор сураггүй болсон байна.

Тэгвэл энэ талаар БНХАУ дахь Тайванын хэрэг эрхлэх газрын төлөөлөгч Ма Шиагуан “Тайванын иргэн Ли Мин Че Үндэсний аюулгүй байдалд заналхийлэл учруулах үйл ажиллагаад оролцсон гэх хэрэгт сэжиглэгдэн шалгагдаж байгаа. Түүний эрүүл мэнд, биеийн байдал нь  сайн байгаа” гэж ярьжээ. Ли энэ сарын 19-ний өдөр сураггүй алга болсон бөгөөд түүнээс хойш 10 орчим хоногийн дараа БНХАУ-аас албан ёсны мэдээлэл хийж буй нь энэ аж.

Мөн Ма сураггүй болсонд тооцогдож байсан Лиг хууль журмын дагуу байцааж байгаа гээд хэргийн талаархи гэр бүлийнх нь хүсэлтийг мөн хүлээн авсан гэдгээ мэдэгдсэн байна. Гэхдээ илүү дэлгэрэнгүй мэдээлэл өгөхөөс татгалзжээ.

Харин Лигийн гэр бүлийн төлөөлөгч гэх Чен Хсю Чуан “Бид ноён Ли-г харах хүсэлт гаргана” гэж мэдэгдсэн байна. Тайванийн хүний эрхийн байгууллагаас мэдээлснээр Ли БНХАУ-д гарч буй хүний эрхийн зөрчилтэй холбоотой асуудлыг шүүмжилж, интер­нэтэд Тайванийн ардчиллын талаар үзэл бодлоо илэрхийлж байжээ.