Засгийн газраас шатахууны үнийн өсөлтөөс сэргийлэх үүднээс автонбензин, дизель түлшний онцгой албан татварыг 3-5 дахин бууруулсан билээ. Гэвч энэхүү шийдвэр гарсны дараахан  шатахуун импортлогч “Петровис”, “Шунхлай” зэрэг компаниуд шатахууныхаа үнийг литрийг нь хөдөө орон нутагт 100-150 төгрөг, хот орчимд 80-100 төгрөгөөр нэмсэн.  Тэднээс араас дагаад зарим компаниуд шатахууныхаа үнийг нэмээд байгаа юм.

Тэгвэл шатахууны үнийн өсөлттэй холбоотойгоор  Ашигт Малтмал Газрын тосны газар, Шударга өрсөлдөөн хэрэглэгчийн төлөө газар холбогдох байгууллагуудтай хамтран ажлын хэсэг байгуулж, компаниуд үнээ өсгөсөн шалтгаан, нөлөөлөх хүчин зүйлийг тогтоохоор шалгалт явуулсан билээ.

Улмаар ажлын хэсгийн шалгалтын дүнд, нэр бүхий компаниуд нь үндэслэлгүйгээр шатахууны үнийг нэмсэн  нь тогтоогдсон учир шатахууны үнийг буцааж буулгах үүрэг өгсөн байна. Тодруулбал,  Шударга Өрсөлдөөн Хэрэглэгчийн Төлөө Газраас автобензин, дизелийн түлшний жижиглэнгийн үнийг нэмэгдүүлсэн "Шунхлай Трейдинг" ХХК, "Магнай трейд" ХХК, "Петростар" ХХК, "НИК" ХХК-д үнээ бууруулах тухай мэдэгдлийг хүргүүлжээ.