Найзынхаа балгаар Ерөнхий­лөг­чийн зөөлөн суудлаасаа буу­хад хүрсэн БНСУ-ын Ерөн­хийлөгч Пак Гын Хегийн  “Сэнүри” нам тус улсад үүссэн улс­төрийн дуулиан шуугианы да­раа нэрээ шинэчилжээ. Тэд энэ удаа “Сэнүри” нэрээ “Эрх чөлөөт Солонгос” хэ­мээн өөрчилсөн байна. Тус на­мын хэвлэлийн төлөөлөгч өчиг­дөр шинэ нэрийн талаархи мэдээл­лийг олон нийтэд цацжээ.

 

Тус улсын Ерөнхийлөгч Пак Гын Хегийн найз Чой Сун Шил өөрийн урлаг, спортын чиглэлээр үйл ажиллагаа явуулдаг сандаа Ерөнхийлөгчтэй дотно байдлаа ашиглан томоохон корпорациудаас хандив нэрийдлээр их хэмжээний авлига авч байсан нь баримттайгаар нотлогдсон байдаг. Тус хэргийн салхинд Пак Гын Хе найзаа улстөрийн үйл хэрэгтээ хөндлөнгөөс оролцуулж байсан нь илэрч, удам дагасан Ерөнхийлөгч, мөн тус улсын анхны эмэгтэй Ерөнхийлөгч гэх тодотголоо  “утсан хүүхэлдэй”, “Гэмт хэрэгтэн”  гэх нэрээр сольж орхисон билээ.

 

БНСУ-ын Сөүл хотноо эсэргүүцлийн жагсаал зохион байгуулагдаж, Пак ард түмэндээ хандсан мэдэгдлийг хэдэнтээ хийсэн ч тусыг эс олсон удаатай.  Мөн парламентын гишүүд Ерөнхийлөгчдөө итгэл үзүүлэх эсэх асуудлаар санал хурааж, ихэнх нь эсрэг байр суурь илэрхийлснээр БНСУ-ын эмэгтэй Ерөнхийлөгч суудлаасаа буусан. Эдүгээ түүнийг огцруулах эсэхийг Үндсэн хуулийн шүүх шийдвэрлэх билээ.

Тэгвэл энэ мэт дуулиан дэгдсэний дараа Сэнүри намын нэр хүнд унаж, зарим гишүүд нь намаа орхиж, дэмжигчдийнх нь хувь хүртэл буурсан юм. Улмаар үүссэн нөхцөл байдлаас намаа аврах зорилгоор эрх баригч хүчнийхэн нэрээ өөрчлөхөд хүрсэн  бололтой.  Өмнөд Солонгос хэдийгээр олон намын тогтолцоотой ч сүүлийн хэдэн сонгуулийн турш одоогийн “Сэнүри”, Нэгдсэн Ардчилсан нам хоёрын хооронд гол өрсөлдөөн өрнөсөөр ирсэн байдаг.

 

Гэвч, Сэнүри түүхэндээ хэд хэдэн ч удаа нэрээ сольсон удаатай. Анх 1997 онд “Үндэсний нам” гэж байгуулагдаж байсан бол 2012 оны сонгуулийн өмнөхөн нэрээ өөрчилж, “Шинэ ертөнц” буюу Сэнүри хэмээн нэрлэж байж. Энэ онд ч гэсэн БНСУ-д Ерөнхийлөгчийн сонгууль болохоор төлөвлөгдөж буй бөгөөд мөн л сонгуулиас урьтан тус нам “Сэнүри” нэрээ “Эрх чөлөөт Солонгос” гэж өөрчилжээ. Нэрээ өөрчилсөн шалтгаанаа намын төлөөлөгч “Бид шинэчлэгдэнэ гэдгээ амлаж буйн зэрэгцээ намынхаа нэрийг Эрх чөлөөт Солонгосын нам болгон өөрчлөхөөр шийдсэн” гэж хэлжээ.

 

Намын нэрийг албан ёсоор шинэчлэх үйл ажиллагаа энэ сарын 13-нд зохион байгуулагдах гэнэ. Тус ёслолд улстөрийн хүчний тэргүүнүүд уригдсан байх бөгөөд тэр өдрөөс хойш “Сэнүри” намыг шинэ нэрээр нэрийдэх аж. Ямартай ч, 2012 оны парламентын сонгуульд намаа удирдан оролцож, өөрийн нэр хүндээрээ намаа аварч, ялалтад хүргэж байсан Ерөнхийлөгч Пак Гын Хе энэ удаа намынхаа нэр хүндийг унагахад голлон нөлөөлсөн гэгдэж байгаа юм. Харин удахгүй болох Ерөнхийлөгчийн сонгуульд нэрээ шинэчилсэн нам хэрхэн оролцох нь олон улсын анхаарлыг татаж байна.