Кино урлагийн хамгийн нэр хүндтэй томоохон наадам болох Оскарт иран найруулагч оролцож чадахгүй болжээ. Асгар Фархади гэгч найруулагч ирэх сард зохион байгуулагдах Оскарын наадамд “The Salesman” киногоо “Шилдэг гадаад кино” номинацид  сойж буй.

Гэвч Оскарын наадам болохоос өмнө АНУ-ын Ерөнхийлөгч Доналд Трамп Иран тэргүүтэй Ойрхи Дорнод, Хойд Африкийн долоо орны иргэдийг улсын хил нэвтрүүлэхгүй байх тухай зарлигт гарын үсэг зурснаар найруулагч эр шагнал гардуулах ёслолд оролцох боломжгүй болсон гэнэ.  Мөн тус киноны гол дүрд тоглосон Таранех Алидости гэх бүсгүй ч мөн Оскарт оролцохгүй болжээ. Найруулагч Асгар Фархади өмнө нь 2012 онд “A Separation” киногоороо Оскар хүртэж байсан юм.

АНУ-ын шинэ Ерөнхийлөгч Доналд Трамп энэ сарын 27-нд Иран, Ирак, Ливи, Сомали, Судан, Сири, Йемен гэсэн долоон орны иргэдэд хориг тавих зарлигт гарын үсэг зурсан юм. Тэрбээр террорист халдлага үйлдэх магадлал өндөртэй гэдэг утгаар аюулгүй байдлын үндсэн дээр тус хоригийг тавьжээ.