Оюуны өмч, улсын бүртгэлийн ерөнхий газар гадаад паспорт шинэчлэлийн ажлыг ирэх оны нэгдүгээр улирлаас эхлүүлэхээр болжээ. Өөрөөр хэлбэл, гадаад паспортыг олон улсын стандартад нийцүүлэн нууцлал бүхий чиптэй болгох юм байна. Ингэснээр тухайн иргэний мэдээлэл  өндөр зэрэглэлийн нууцлалтай болох аж.

 Энэ талаар Оюуны өмч, улсын бүртгэлийн ерөнхий газрын дарга Р.Содхүү  “Өмнө нь байсан нууцлалуудыг багтаахаас гадна олон улсын стандартад шаардлага хангахуйц бүх мэдээлэл, нууцлалыг багтааж байгаа. Үнэ нэмэгдэх эсэхийг хэлж мэдэхгүй байна, хэлэлцээр үргэлжилж байгаа учраас.

Гэхдээ үнэ гэдэг зүйлээр барьцаалагдахаас илүү олон улсын шаардлагад нийцсэн гадаад паспортоор зорчино, хаана ч асуудал үүсэхгүй гэдгийг ойлгох хэрэгтэй. Нууцлал сайтай учраас үнэ бага зэрэг нэмэгдэхийг үйгүйсгэхгүй. Олон улсад хүлээн зөвшөөрөгдсөн бүтээгдэхүүн хэрэглэж байгаа учраас бага зэргийн үнийн нэмэгдэлд иргэд эсэргүүцэхгүй байх” гэв. Дашрамд сонирхуулахад, 2019 он гэхэд Монголын Улсын иргэд цахим гадаад паспорттой болох юм байна.