Төрийн өмчийн бодлого зохицуулалтын газрын дарга Ц.Ням-Осор өнөөдөр төрийн өмчийн тооллогын талаар мэдээлэл хийлээ. Энэ удаагийн тооллогыг 2015 оны арванхоёрдугаар сарын 31-ний өдрийн санхүүгийн тайлангийн дүнгээр тасалбар болгон явуулжээ.

Тооллогод нийт 6086 хуулийн этгээд хамрагдсан байна. Тухайлбал, төрийн 1128, орон нутгийн өмчийн 4958 нэгж хамрагдсан гэдгийг албаныхан онцолсон.

Мөн тооллогоор нийт 194 тэрбум төгрөгийн хөрөнгө бүртгэлгүй, 1.8 тэрбум төгрөгийн хөрөнгө дутсан нь тогтоогджээ. Түүнчлэн 32.6 тэрбум төгрөгийн хөрөнгө маргаантай байгааг илрүүлсэн байна. Хурлын үеэр Төрийн өмчийн бодлого зохицуулалтын газрын дарга Ц.Ням-Осор газрын маргаантай асуудал их илэрсэн гэдгийг онцолсон юм. Тухайлбал, төрийн өмчийн байгууллагад нийт 9676 нэгж талбарын 118473.9 га газар эзэмших, ашиглах эрх тоологдсоноос  110 нэгж газрын гэрчилгээг авч баталгаажаагүй байжээ.

Үзлэг, тооллоготой холбогдуулан цаашид төрийн болон орон нутгийн өмчит хуулийн этгээдийн газар эзэмших, ашиглах эрхийг үнэлж, санхүүгийн тайланд тусгах, үл хөдлөх хөрөнгөд дахин үнэлгээ хийхийг анхааруулсан юм. Мөн концессын гэрээгээр барьсан барилга, зам, гүүр, тоног төхөөрөмж зэргийг төрийн өмчийн бүртгэлд тусгах хэрэгтэй юм байна.