Рок попын ертөнцөд Ану гэх нэрээрээ танигдсан СТА, дуучин Б.Мягмарсүрэнгийн “Үүр шөнийн оддоос асуугаарай” хэмээх дууг мэдэхгүй хүн цөөн болов уу.

Түүний энэ дуу нэг хэсэгтээ л хит болж, олон ч залуусыг уярааж явсан удаатай. Гэвч, түүний нөхөр, нэрт яруу найрагч З.Түмэнжаргал агсан таалал төгссөнөөс хойш дуучин Б.Мягмарсүрэн хөгшин Европын “хаан” Франц улсыг зорьж, үр хүүхдээ өсгөхийн зэрэгцээ Сорбоны их сургуульд урлагийн чиглэлээр багшилж эхэлсэн байдаг.

Тэгвэл “Ану” эх орондоо, их урлагтаа эргэн ирж, “Үүр шөнийн оддоос асуугаарай” гэх амьд тоглолтоо өнөөдөр хийх гэж байгаа аж. Түүний тоглолт “UB jazz” клубт болох юм байна. Дуучин бүсгүй  тоглолтынхоо үеэр “Сайхан чамдаа”, “Үүр шөнийн оддоос асуугаарай”, “Цахилах гөрөөс”, “Тэнгисийн цагаан бороо”, “Дууны хорвоо” зэрэг монголчуудын зүрх сэтгэлд хэдийнэ хоногшсон уран бүтээлээ толилуулах ажээ.