Улаанбаатар хотын Ерөнхий менежерийн 2016 оны арваннэгдүгээр сарын 29-ний өдрийн А/154 тоот тушаалаар Улаанбаатар хотын цас мөсний цэвэрлэгээ хийх нийтийн эзэмшлийн гол гудамж, зам талбайн хуваарийг баталжээ. Тус тушаалын дагуу  энэ дугаар сарын 01-ний өдрөөс ирэх оны дөрөвдүгээр сарын 01-ний өдөр хүртэл мөрдөхөөр боллоо. Нийтийн эзэмшлийн 131 гудамжны 72 гудамж буюу 55 хувийг дүүргийн ТҮК болон хувийн хэвшлийн байгууллагууд, 59 гудамжийг “Хот тохижилтын газар” ОНӨААТҮГ хариуцан ажилладаг ажээ.

Уг тушаалын дагуу “Хот тохижилтын газар” ОНӨААТҮГ нь Токиогийн гудамж, Манлайбаатар Дамдинсүрэнгийн гудамж, Намянжугийн гудамж, Залуучуудын гудамж, Доржийн гудамж, Дандарбаатарын гудамж, Баянзүрхийн товчоо, Бээжингийн гудамж, Энхтайваны өргөн чөлөө, Баянзүрхийн өндөрлөг хүрэх зам, Цагдаагийн академийн өргөн чөлөө, Гачууртын зам, Нийслэл хүрээ өргөн чөлөө, Их тойруугийн гудамж, Дүнжингаравын зам, Богд уулын арын зам, Их тойруугийн гудамж, Нарны зам, Дарь Эхийн зам, Бага тойруу зэрэг нийт гудамж, зам талбайн 45 хувийн цас, мөсний цэвэрлэгээг хариуцан ажиллах юм байна.