Авлигатай тэмцэх газраас анхан шатны эмнэлэгт шалгалт хийсэн байна. Энэ хүрээнд анхан шатны эмнэлэг төлбөр, хураамж авсан асуудлыг судалж, нийслэлийн Баянгол дүүргийн IV дүгээр хорооны “Угтахуй” өрхийн эрүүл мэндийн төвийн үйл ажиллагаатай газар дээр нь очиж танилцжээ.

Шалгалтын явцад тус төв нь Эрүүл мэндийн сайдын баталсан нийтлэг үйлчилгээ үзүүлэхэд төлбөр авахыг хориглох журмыг зөрчиж байсан нь илэрчээ. Тодруулбал, дотоод журамдаа иргэд, үйлчлүүлэгчдээс 13 төрлийн төлбөр, хураамж авахаар заасан байна. Энэхүү төлбөрт үйлчилгээг байгууллагын дотоод журмаар зохицуулсныг хянан үзэхэд АМ-13 дугаар маягт, эмчлүүлэгчдийн картыг иргэдэд 500 төгрөгийн төлбөртэй хүргэж байсан аж.

“Угтахуй” өрхийн эрүүл мэндийн төвийн дарга эрх хэмжээгээ хэтрүүлж Эрүүл мэндийн сайдын бүрэн эрхэд хамаарах асуудлаар шийдвэр гаргасан аж. Дээрх асуудлаар Авлигатай тэмцэх газраас холбогдох хууль тогтоомжид заасан хариуцлагыг тооцуулахаар хандсаны дагуу нийслэлийн Баянгол дүүргийн Эрүүл мэндийн төвийн даргын тушаалаар хууль зөрчсөн буруутай этгээдэд сахилгын шийтгэл ногдуулсан байна.