АНУ-ын Цагаан ордны тэргүүнийг сонгох сонгуулийн санал хураалт орон нутгийн цагаар маргааш болно.  Сонгуульд Бүгд найрамдах намаас үл хөдлөх хөрөнгийн тэрбумтан Доналд Трамп, Ардчилсан намаас Төрийн нарийн бичгийн дарга асан Хиллари Клинтон нар нэр дэвшиж байгаа юм. 

Тэгвэл сонгуулийн санал хураалт болохоос хэдхэн хоногийн өмнө Трамп дахин халдлагад өртөх шахсан талаарх мэдээлэл гарч эхэллээ. Тодруулбал,  АНУ-ын Невада мужийн Ренод энэ сарын 5-ны өдөр Доналд Трамп  сонгогчидтойгоо уулзан илтгэл тавьж байжээ. Гэтэл түүний хамгаалагчид нь гэнэт тайзнаа гарч ирэн түүнийг хамгаалан  индрээс буулгаж, хэсэг хугацаанд эмх замбараагүй байдал үүссэн байна.

Улмаар хэдэн минутын дараа  тэрбээр эргэн тайз руу гарч, илтгэлээ үргэлжлүүлж,  “Сонгуулийн кампанит бидний хувьд тийм амар ажил биш. Гэхдээ бид хэзээ ч зогсохгүй” гэж хэлсэн байна.  Трампыг илтгэлээ тавьж байхад нь түүний хамгаалалтын албаны нэг хүн  индэрийн урд зогсож  байсан нэгэн этгээдэд буу байна гэж  хашгирснаар дээрх хэрэг мандсан аж.

Хэргийн сэжигтэн ч  баривчлагдсан гэнэ.  Гэвч  зарим эх сурвалж тэнд ямар ч буу байгаагүй төдийгүй, энэ удаагийн хэрэг  бизнесмэн эрийн  зүгээр л нэг  шоуны хэлбэр байсан байх магадлалтайг онцолж байна.

Өмнө нь зургадугаар сард Доналд Трампын амь насанд 19 настай залуу халдахыг завдаж, тухайн үедээ том дуулиан тарьж байсан удаатай.