Японы орчин үеийн урлагийн уран бүтээлч, “Кёозан-Ха” урлагийн үзэл санааны хөдөлгөөнийг үндэслэгч Торү Күранүкийн “Хязгааргүй чулуун цуурай” уран бүтээлийн үзэсгэлэнг “Чингис хаан” Үндэсний музейд энэ сарын 20-ны өдөр нээлээ.

Өдгөө 77 настай Торү Күранүки нь бүтээлийнхээ үзэл санааг чулуугаар илэрхийлдэг, чулууны бүтэц, өнгөний нийлэмжийг уран бүтээлдээ тусгадгаараа онцлог уран бүтээлч юм. К-veritas, Япон Улсын Элчин сайдын яам, “Чингис хаан” Үндэсний музей хамтран зохион байгуулах тус үзэсгэлэнд 77 бүтээл дэлгэсэн нь энэ байв. Дэлхийн хамгийн хуучин атлаа хэзээ ч хуучиршгүй чулууны мөн чанарыг бүтээлүүддээ шингээхийн зэрэгцээ монгол чулуу зөвхөн байгалийн материал бус амьтай, эзэнтэй, сүнслэг гэсэн агуулгыг ч давхар илэрхийлэх ажээ.

Япон Улсын Цог Жавхлант Эзэн Хаан Нарүхито манай улсад энэ онд айлчилж, хоёр орны соёлын харилцаа улам өргөжиж буй энэ үед орчин үеийн урлагийн томоохон төлөөлөл үзэсгэлэнгээ нээж байгаа нь онцлууштай юм. 

Үзэсгэлэнгийн нээлтэд нэрт үнэт эдлэл цуглуулагч Казүми Арикава, Японы бизнесмэн Хөрөнгө оруулагч тэрбумтан Таками Юүичи, Сангийн сайд асан, ЭЗБӨЧС төвийн УЗ-ын дарга П.Цагаан нар уригджээ.