Украинд явуулж байгаа цэргийн тусгай ажиллагаа, арми, хүчний байгууллагуудыг шүүмжилж, худал мэдээлэл түгээвэл хөрөнгийг нь хурааж байх хуулийн төслийг ОХУ-ын Төрийн думын спикер Вячеслав Володин тэргүүтэй парламентын ихэнх гишүүд дэмжин өргөн барьсан байна. Үүнийг  улс орны аюулгүй байдлын эсрэг, гэмт хэрэгт уриалсан хэрэг гэж үзнэ гэжээ. Хуулийн төсөлд дурдсанаар бол  ийм хүмүүсийн цол, шагналуудыг бас хурааж болно гэсэн байна.  

Төрийн думын алба ёсны сайтад нийтэлсэн хуулийн төсөлд “армийн тухай худал мэдээлэл”-ийн төлөө хөрөнгийг нь хураахаас гадна Эрүүгийн хуулийн 280,3-т заасан “улсын аюулгүй байдлын эсрэг”, Эрүүгийн хуулийн 280,4-т заасан “гэмт хэрэгт ил тод  уриалсан” хэрэг гэж хэрэг үсгэх юм байна. 

“Эрх баригчдын сэдлийг ойлгох нь тийм ч  хэцүү биш, мэдээж энэ бол сонгуульд бэлтгэж байгаа нь энэ. Засгийн газар тус бүс нутагт эсэргүүцлийн хөдөлгөөн өрнөхөөс  маш их айж болохоор  Эрүүгийн хуулийн 280.4 –т байдаг өмчийг нь  хураан авах боломжтой гэсэн зүйл заалтуудыг жагсаалтад оруулсан байна” гэж хүний эрхийг хамгаалах OVD-Info төслийн хуульч Мария Чащилова The Moscow Times сонинд ярьжээ. Эрх баригчид ийм байдлаар  өөрсдийг нь шүүмжлэгчдийн амыг хаахыг эрмэлзэж байна. Ер нь оросын эрх баригчдын ийм хандлага бол шинэ зүйл биш, хуулийн төсөл зохиогчид буруутай гээнэ хүнд оноох хариуцлагыг чангатгах, улмаар улс төрийн шинжтэй болгохыг л оролдож байна хэмээн тэр нэмж хэлжээ.

Улсын аюулгүй байдлын эсрэг гэмт уриалах заалтыг хөлсний зорилгоор, түүнчлэн улс төр, үзэл суртал, арьс өнгө, үндэсний болон шашны үзэн ядах, дайсагнах, нийгмийн ямар нэг бүлэглэлийн эсрэг дайсагнасан зорилгоор гэмт хэрэг үйлдэх гэсэн заалтаар нэмэх саналтай байна. 
Хүний эрхийн төлөө тэмцэгчийн үзэж байгаагаар бол  сүүлийн жилүүдэд бий болсон шүүхийн практик, хуулийн төсөлд шалгуур үзүүлэлтийг нарийн заагаагүй бүдэг бадаг үг хэллэгтэй зэрэгцэн хууль сахиулагчдад хуулиар тогтоосон дүрмийг аль болох өргөн хүрээнд тайлбарлах боломжтой болж байгаа гэнэ.

“Оросын шүүхийн практикт хүчний байгууллагын  албан тушаалтнуудыг нийгмийн бүлэг гэж хүлээн зөвшөөрсөн жишиг угаасаа бий. Тэгэхээр хэрэв хүсвэл эрх баригчид, хууль сахиулагчид, тэр байтугай сүм хийдийн ламтангуудыг шүүмжилсэн хүмүүсийг “төрийн аюулгүй байдлын эсрэг гэмт хэрэг үйлдэхийг уриалсан” гэж буруутган, өмч хөрөнгийг нь хурааж авах боломжтой болж байгаа юм” гэж Чащилова хэлж байна.

Энэ хуулийн төслийг Төрийн думд өргөн барихаас өмнө Ерөнхий прокурорын газар, Мөрдөн байцаах хороо, Хуульзүйн яам, Оросын санхүүгийн хяналтын алба Хуулийн төсөл боловсруулах Засгийн газрын комисс дэмжээд  зарим гэмт хэргийн төлөө цэргийн цол, шагналуудыг хураах зүйл заалт нэмэхийг санал болгожээ. 

Ийм гэмт хэрэг гэдэгтээ  армийн талаар худал мэдээлэл түгээх, нэр хүндийг нь гутаан доромжлох,  хэт даврах үзэлд уриалах, улсын аюулгүй байдлын эсрэг үйл ажиллагаа, салан тусгаарлах үзэл, үзэн ядах, дайсагнах, үндсэрхэг үзэл сурталчлан сэргээх, нацистуудын бэлгэдийг түгээн сурталчлах,  хуулиар хориглосон байгууллагад нэгдэх,  Оросын  эсрэг хориг тавихыг уриалах, гадаадад байгаа цэргийн болон албан тушаалтнуудыг мөрдөн шалгах ажилд садаа учруулах зэргийг оруулж байгаа юм байна. 

Энэ хуулийн төслийг батлан дагаж мөрдсөнөөр “Үндсэн хуулийн засаглалын үндэс, улс орны батлан хамгаалах чадавхи, төрийн аюулгүй байдлыг алдагдуулах зорилго бүхий  гэмт хэргийн шинжтэй үйлдлээс урьдчилан сэргийлэх, таслан зогсооход чиглэнэ” гэж уг баримт бичгийн тайлбарт дурджээ.

Эх сурвалж: Монголын мэдээ сонин

2024 оны нэгдүгээр сарын 30. Мягмар. №010 (5928)