“Согтуугаар машин барьсан тохиолдолд эхний ээлжинд эрхийг нь хасч 7-30 хоног хорино, харин  хоёр дахь тохиолдлоос 2.7-14  сая төгрөгөөр торгож зургаан сараас гурван жил хорино” гэдэг  хууль хэрэгжээд эхэлчихлээ.

Архидан согтуурах явдал хэмээс хэтэрч хоногт 110-160 жолооч согтуугаар тээврийн хэрэгсэл жолоодож яваад баригддаг байсан бол энэ хууль хэрэгжиж эхэлсэн 2024 он гараад эрс буурчээ. Гэлээ ч бас сурсан юмыг сураар боож болдоггүй гэгчээр нэгдүгээр сарын 5-нд гэхэд л 53 жолооч согтууруулах ундаа хэрэглэсэн үедээ жолоо барьж явсан нь илэрсэн байна.  

Хүн дайрч амь насыг нь хохироож, бэртээж гэмтээж, бүр гарцаар гарч явсан сурагч охины амийг хөнөөн, нэгийг нь гэмтээсэн тохолдол гарч байлаа. Хоёр  хүүхдийг замын хашлагад нидэрчихсэн машин жолоодох эрхгүй хүүхнийг хэд гуравхан төгрөгөөр торгоод өнгөрөөж л байлаа. Ийм зөрчил өчнөөнөөрөө л гардаг. Чухамдаа жолоо барьсан ийм алуурчдад хүлээлгэх хариуцлага нь дэндүү сул байснаас л ийм  зөрчил, гэмт хэрэг хавтгайрсан.

Хуульзүй дотоод хэргийн сайд асан Х.Тэмүүжин,  “Согтуугаар жолоо барьсан хүмүүсийг сараар гэмтлийн эмнэлэг, моргт ажиллуулж, зам дээр зогсоон хөдөлгөөний аюулгүй байдлыг явганаар мэдрүүлж, согтуу машин барих ямар аюултай болох тухай өөрсдөөр нь согтуучуудад яриа ухуулга хийлгэх хэрэгтэй. Гэхдээ энэ бүхний зардлыг өөрсдөөс нь гаргуулдаг болох ёстой. 

Энэ нь татвар төлөгчдийн мөнгөөр шоронд жил тэжээж хэвтүүлснээс дээр үр нөлөөтэй” гэж хэлээд л байсан. 

Эрх баригчид дуулсан ч дуулаагүй юм шиг, сөрөг намын нөхөр ч гэдэг юм уу, өнгөрөөгөөд байсан болохоос биш үнэхээр тэднийг ард түмний татварын мөнгөөр тэжээж шоронд амраагаад яах ч  юм билээ.

Харин Хуульзүй дотоод хэргийн сайд Б.Энхбаяр жолоо барьсан алуурчидгүй болгох эхлэлийг тавьчихлаа. 

“Согтуугаар жолоо барьсан хүнд арай дэндүү өндөр торгууль, шийтгэлтэй байна” гэсэн санал, бичвэр олон нийтийн сүлжээгээр  шуугьж л байна, үүнийг тоогоод яахав. Хөнгөн шийтгэл, бага ялтай байвал яана гэж согтуурсан үедээ машин барьж л байя гэж үү. Үгүй дээ......согтууруулах ундаа уусан үедээ машин барихаа л больчих л доо. 

Гэхдээ юм хоёр талтай. Согтуугаар машин барьж яваад эрхээ хасуулах, бүр арав хорин сая төгрөгөөр торгуулах дээрээ тулсан хүн яах вэ. Цагдаатай, замын зохицуулагчтай  тохиролцох юм биш байгаа...

“Ар гэрийн амьдрал хэцүү байна, намайг зам дээр зохицуулагч хийлгэж өгөөч” гэдэг чинь замын цагдаагаас өөрсдөөс нь гарсан үг шүү. Муугаар бодоход хэн машин жолоодох эрхээ хасуулж, 14 сая төгрөгөөр торгуулахыг бодох юм бэ. Түүний оронд хөөрхий “амьдрал нь хүнд” байгаа цагдаад сая төгрөг өгөөд салахыг бодох хүн захаас аваад гарна. 

Ийм тохиолдолд яах вэ, үүнийгээ хэрхэн яаж зохицуулж, шийдэх юм. Манайх уг нь цахим сайдтай, гудамж талбай нь бүгд камертай. Цагдаа нараа хариуцлагажуулж шударга болгож чадвал Монгол Улс согтуу жолоочгүй болж болмоор л байна. Эс тэгвээс “өө болдог л юм, цагдаад хэдэн цаас атгуулчихад юу л болоо аж” гэсэн хэнэггүйтэл газар авч, жолоо барьсан ухаан мэдрэлгүй алуурчид гудамжаар хөлхөлдөөд л байх юм биш байгаа хэмээн сэтгэл зовином. 

Хөөрхий амьдралаа авч яваа жолооч нартаа хатуурхаж машин  тэрэг барих эрхийг нь хасч торгууль цуглуулах гээд байгаа юм огт биш, согтуугаар машин барихыг нь болиулчих гээд байгаа юм шүү дээ. 

Эх сурвалж: Монголын мэдээ сонин

2024 оны нэгдүгээр сарын 11. Пүрэв. №003 (5921)