Оросын хувийн цэргийн “Вагнер” бүлэглэл өчигдөр үүрээр Донын Ростов хот руу нэвтэрч, цэргийн байгууламжуудыг хяналтад авснаа зарласнаар Оросын нөхцөл байдал олон улсын анхаарлын төвд ороод байна.

Гэхдээ ОХУ-ын дотоод асуудал гэдэг үүднээс нь улс орнууд байдлыг ажиглах байр суурьтай байгаагаа илэрхийлж байна.

Евгений Пригожин тэргүүтэй “Вагнер” хөлсний цэргийн бүлгийнхэн орон нутгийн цагаар өчигдөр 05:00 цагийн үед Донын Ростов хотод нэвтэрч, ОХУ-ын Өмнөд цэргийн тойргийн төв штаб болон бусад цэргийн байгууламжийг хяналтдаа авсан гэж мэдэгдсэн байна. Үүний өмнө Пригожин цэргүүдийнх нь байрлалд пуужингийн цохилт өгсөнд Оросын Батлан хамгаалах яамны удирдлагуудыг буруутгаж тэднийг хүчээр зайлуулахаа мэдэгдсэн байна.

Харин БХЯ-ны зүгээс Вагнерын хүчний байрлалд пуужингаар довтолсон гэдгийг үгүйсгэж, энэ мэдэгдлийг нь “өдөөн хатгалга” гэж нэрлэжээ.

Үүсээд байгаа нөхцөл байдалтай холбогдуулж Оросын Ерөнхийлөгч Владимир Путин өчигдөр телевизээр ард иргэд болон зэвсэгт хүчин, хууль сахиулах байгууллагынханд хандаж мэдэгдэл хийлээ. 

Тэрбээр “Вагнер” хувийн цэргийн бүлэглэлийн үйл ажиллагааг “Хэт их амбиц, хувийн ашиг сонирхол”-оос үүдсэн “урвалт” гэж нэрлээд, босогчдыг “Гэмт үйл ажиллагаанд оролцохоо зогсоож, амь зольсон, эмгэнэлт алдаа гаргахгүй байхад” уриалжээ.

Евгений Пригожины удирддаг “Вагнер” хувийн цэргийн бүлэглэлийг Владимир Путин улс орны эв нэгдлийг хагалан бутаргаж, “Ард түмэн болон фронтод дайтаж байгаа дайчин нөхдөөсөө урвасан хэрэг” гэж нэрлээд, босогчдыг хатуу шийтгэх болно гэж мэдэгдсэн байна.

Владимир Путин хэлсэн үгэндээ, Донын Ростов хотын байдал “хүнд” байгааг мэдэгдэж, Москва хот, Москва муж, бусад бүс нутгуудад “Терроризмтой тэмцэх онц байдал зарласан”-ыг мэдээлсэн.

Оросын Холбооны Аюулаас хамгаалах алба мөн зэвсэгт бослогод уриалсан хэргээр Пригожинд эрүүгийн хэрэг үүсгэснийг зарласан байна.

Харин Пригожин Ерөнхийлөгч Владимир Путины мэдэгдлийн дараа бослогод уриалсан гэдэг зэмийг үгүйсгэж, зэвсгээ хураалгах бодолгүй байгаагаа мэдэгджээ.

Энэ зуур Донын Ростов болон Воронеж хотуудаар дамжиж Москва ордог “Дон” нэртэй авто замын М-4 чиглэл дэх бүх хөдөлгөөнийг хязгаарласан, мөн Воронеж хотын нисэх буудал болон авто вокзалаас хөдөлгөөн зогссон, харин галт тэрэгний хөдөлгөөн хэвийн үргэлжилж байгаа талаар Оросын “Интерфакс” болон "Ройтерс", "Би-Би-Си" зэрэг мэдээллийн агентлаг уламжилж байна.

Олон улсын зүгээс харин Орос дахь үйл явдлыг ажигласан байр суурьтай байгаагаа мэдэгдэж байна. АНУ-ын Ерөнхийлөгч Жо Байден, Францын Ерөнхийлөгч Эммануэл Макрон, ХБНГУ-ын канцлер Олаф Шольц нарын албаныхны зүгээс ийм байр суурь илэрхийлсэн байна.

Их Британийн Ерөнхий сайд Риши Сунак мөн адил байр суурь илэрхийлсний дээр “Бүх талыг хариуцлагатай байж, энгийн иргэдийг хамгаалахад” уриалжээ.

Украины Ерөнхийлөгч Зеленский “Телеграм” сувгаар дамжуулж хийсэн мэдэгдэлдээ ОХУ зэвсэгт хүчин, хөлсний цэргүүдээ Украинд байлгасаар байх нөхцөлд өөрт нь “Эмх замбараагүй байдал, өвдөлт шаналал, асуудал тулгарсаар байх болно” гэж мэдэгджээ.

Европын Холбоо мөн Пригожинтой холбоотойгоор Орост өрнөж байгаа үйл явдлыг ОХУ-ын дотоод асуудал гэж үзэж байгааг Европын комиссын төлөөлөгч сэтгүүлчдэд мэдэгджээ.

НАТО мөн байдлыг анхааралтай ажиглаж байгаагаа мэдэгдэж байгаа бол, Польш зэрэг Оростой хил залгаа орнуудын тухайд аюулгүй байдлаа чангатгаж байгаа мэдээллүүд ирж байна.