“Титаник” хөлөг онгоцыг үзэхээр явсан таван хүний бүрэлдэхүүнтэй багийн шумбагч хөлгийг олсон ч зорчигчид бүгд амиа алдсан байжээ. Тэд хүчилтөрөгчийн дутагдлаар бус хүчтэй дэлбэрэлтийн улмаас нас барсныг CNN мэдээллээ.

Шумбагч онгоц эх хөлөгтэйгөө холбоо тасрах үед дэлбэрэлттэй дүйцэхүйц хүчтэй долгионы шинж тэмдэг илэрсэн гэж Тэнгисийн цэргийн өндөр албан тушаалтан ярьжээ. Дараа нь Тэнгисийн цэргийнхэн энэ мэдээллийг эрэн хайх ажиллагааны командлагчдад нэн даруй дамжуулж, эрлийн бүсийг нарийвчлахад ашигласан гэв.

Гэвч дэлбэрэлтийн чимээ нь тодорхой биш байсан тул шумбагч онгоцыг хайх, хүмүүсийг аврах ажиллагаа удаан үргэлжилсээр байв.

АНУ-ын эргийн хамгаалалтын алба Пүрэв гарагийн эхээр далайн ёроолоос сүйрсэн хөлгийг илрүүлсний дараа л шумбагч онгоц  дэлбэрэлтэд өртөн дотор нь байсан таван хүн бүгд амь үрэгдсэнийг мэджээ.

Алга болсон шумбагч онгоцны сүүлний хэсэг болон бусад тарсан хэсгийг Атлантын далайн хойд хэсэгт 4 км гүнд орших Титаник хөлгийн үлдэгдлээс 4,2 км зайд алсаас удирддаг шумбагч төхөөрөмжийн тусламжтай олсон байна.

Хөлөгт OceanGate компанийн захирал Стоктон Раш, тэрбумтан Хамиш Хардинг, Францын иргэн Пол-Хенри Наргеолет, бизнесмен Шахзада Давуд болон түүний хүү Сулеман Давуд гэсэн таван хүн зорчиж явсан юм.