Үндэсний их баяр наадмын тухай хуульд зааснаар сумдын тэгш ойг тэмдэглэх хугацааг аймгийн Засаг дарга тогтоодог. Харин аймгуудын тэгш ойг тэмдэглэх хугацааг Засгийн газар шийддэг аж. 

Тиймээс энэ жил таван аймгийн 100 жилийн ой тохиож байгаа юм. Иймд эдгээр аймгийн тэгш ойг тэмдэглэн өнгөрүүлэх тухай Засгийн газрын тогтоол өчигдөр гарлаа.

Тухайлбал, Ардын Засгийн газрын 1923 оны шийдвэрээр Цэцэрлэг Мандал уулын аймаг, Богд хан уулын аймаг, Хантайшир уулын аймаг, Хан Хэнтий уулын аймаг байгуулагдсаны 100 жилийн ойн баяр наадмыг Архангай, Төв, Завхан, Хэнтий аймагт 2023 оны долдугаар сарын 27, 28-нд, Хантайшир уулын аймаг байгуулагдсаны 100 жилийн ойн баяр наадмыг Говь-Алтай аймагт наймдугаар сарын 01, 02-нд тус тус тэмдэглэнэ.

Хурдан морины бүсийн уралдааныг аймаг байгуулагдсаны ойн баяр наадамтай хамтатган зохион байгуулна.

Мөн аймгийн Засаг дарга нараас ирүүлсэн саналыг үндэслэн Говьсүмбэр аймгийн баяр наадмыг 2023 оны долдугаар сарын 06, 07, Булган аймгийн баяр наадмыг тус сарын 08, 09, Дорноговь аймгийн баяр наадмыг 27, 28-нд тус тус тэмдэглэхийг зөвшөөрлөө. Өөрөөр хэлбэл Архангай, Төв, Завхан, Хэнтий,  Говь-Алтай аймаг 100 жилийн ойн баяр наадмаа тэмдэглэнэ.