Их Британийн Ерөнхий сайдын албыг авснаас хойшхи 100 дахь хоногтойгоо аль хэдийнэ золгоод буй Тереса Мэй ЕХ-той хийх хэлэлцээрийг ирэх оны гуравдугаар сард зохион байгуулах талаар  үг унагалаа.  Тус улсын Бирмингем хотод энэ сарын 5-ныг хүртэл эрх баригч Консерватив намын их хурал зохион байгуулагдаж байгаа юм. Тэгвэл их хурлын үеэр Ерөнхий сайд  өнгөрсөн зургадугаар сард болсон ЕХ-оос гарах эсэх талаарх санал асуулгаар  иргэдийн гаргасан шийдвэрийг хэрэгжүүлэх  эхний алхмын талаар хэлэлцжээ.   

Улмаар ЕХ-оос гарах мэдэгдлийг ирэх жилийн гуравдугаар сарын сүүлч гэхэд албан ёсоор гаргахаа энэ үеэр дурьдсан байна. Тереса Мэй анх удаагаа мэдэгдэл гаргах хугацааг тодорхой зарласан нь энэ юм.  

Түүний хувьд өмнө нь ЕХ-оос гарах тухай мэдэгдлийг “Энэ жилдээ амжихгүй” хэмээж байв. ЕХ-ны дүрмийн  50 зүйлд заасны дагуу   гарах нөхцлийг хангасан тохиолдолд асуудал мэдэгдэл өгснөөс хойш хоёр жилийн хугацаанд шийдвэрлэгдэнэ. Тиймээс хэлэлцээр тодорхой үе шатаараа үргэлжилсэн тохиолдолд 2019 оны гуравдугаар сарын сүүл гэхэд ЕХ-оос гарах боломжтой болох юм.  Гэхдээ хэлэлцээрт урьдчилан тооцоолоогүй бэрхшээл гарч ирэхийг үгүйсгэх аргагүй бөгөөд өнөөгийн нөхцөл байдалд хоёр жилийн хугацаанд шийдэгдэх боломж маш бага гэдгийг ажиглагчид хэлж байна.  Өмнө нь ЕХ-г орхисон ямар ч гишүүн улс байхгүй билээ.  Хэлэлцээрийн хугацаа бүх

гишүүн орнууд санал нэгдсэнээр сунгагддаг аж.
Тереса Мэй Их Британийн Ерөнхий сайдын албан тушаалд томилогдсоноос хойшхи анхны их хурал  нь энэ удаагийнх юм.  Тэрбээр их хуралд илтгэл тавихдаа ЕХ-оос гарах талаархи хэлэлцээр өнгөрсөн 40 гаруй жилийн түүхэнд өрнүүлсэн гэрээ хэлцлээс огт өөр байдлаар өрнөнө гэдгийг онцолжээ. Их Хуралд Тереса Мэйгээс гадна ЕХ-оос гарах асуудлыг хариуцлан ажиллаж буй Дэвис, Гадаад хэргийн сайд Жонсон нарын албаны гурван эрхэм үг хэлсэн байна. Дэвисийн хувьд Их Британи болон ЕХ–ны хооронд “Чөлөөт худалдааг аль болох их хийхийг зорьж байгаа” гэж хэлсэн аж.  Тереза Мэйн дэмжигчдийн хувьд харьцангуй өндөр байгаа ч, есдүгээр сарын сүүлчээр явуулсан олон нийтийн санал асуулгаар Засгийн газрын ажлыг иргэд доорх үзүүлэлтээр дүгнэжээ. Тодруулбал,  ЕХ-оос гарах ажил эрчимтэй өрнөж байгаа гэж судалгаанд оролцогсдын 16 хувь нь хариулсан бол “урагшлахгүй байна” гэж 50 гаруй хувь нь дүгнэсэн байна.  Өнгөрсөн зургадугаар сард иргэдийн сонгосон ЕХ-оос гарах шийдвэрийг хэрхэн хэрэгжүүлэх нь тодорхой бус байсны улмаас иргэд Засгийн газрын үйл ажиллагаанд сэтгэл дундуур байх болсон юм.