Ирэх арваннэгдүгээр сард болох АНУ-ын Ерөнхийлөгчийн сонгуульд Ардчилсан намаас Төрийн нарийн бичгийн дарга асан Хиллари Клинтон, Бүгд найрамдах намаас үл хөдлөх хөрөнгийн тэрбумтан Доналд Трамп нар нэр дэвшиж байгаа.  Трампын хувьд улс төр дэх анхлан сурагцагч гэж хэлж болох хэдий ч, бизнесийн асар их туршлагатай нэгэн. Харин  Хиллари  улс төр дэх эмэгтэй хатуу самруудын нэг юм.  Амьдралын туршлага үзэл бодол тэс өөр ийм хүмүүс  төрийн тэргүүн болон гүйцэтгэх засаглал болох Засгийн газрын тэргүүн гэсэн хоёр том үүргийг гүйцэтгэх АНУ-ын хамгийн “хүчирхэг” хүн болохын төлөө өрсөлдөж байна.  Тэгвэл нэр дэвшигчдийн анхны халз мэтгэлцээн өнгөрөгч даваа гарагт болсон юм. 

1960 оноос хойш халз мэтгэлцээн зохион байгуулагдах болсон бөгөөд анхны мэтгэлцээнд ялсан эрхэм дараагийн Ерөнхийлөгч болдог  гэх  яриа ч бий. Тиймээс энэ үед зарим агентлагууд иргэдийн дунд санал асуулга явуулж, хэн ялсныг тус бүртээ үнэлэхийг оролдсон. Гэхдээ зарим агентлагууд мэтгэлцээнд Хиллариг ялсан гэж үзсэн бол зарим нь нэр дэвшигчид ижил тэгш байсныг онцолж байлаа.  

Харин хамгийн сүүлийн үеийн судалгааны үр дүн хэрхэн гарсныг уншигчиддаа сонирхуулъя.  Өнгөрөгч сарын 26-ны өдөр орон нутгийн цагаар үдшийн 21.00 цагт эхэлсэн халз мэтгэлцээний дараа “RealClear Politics” сайт санал асуулга явуулж,  эцсийн дүнг энэ сарын 1-нд зарлав.

Ингэхэд Төрийн нарийн бичгийн дарга асан Хиллари Клинтоныг дэмжигчдийн хувь нэмэгдэж, эсрэгээрээ тэрбумтан Доналд Трампын дэмжигчдийн тоо буурчээ. Мэтгэлцээний дараа тэдний дэмжигчдийн хувь ерөнхийдөө тэнцсэн үзүүлэлттэй байв. Маш бага хувийн зөрүүтэйгээр Хиллари тэргүүлж байсан ч, АНУ-ын улс төрийн мэдээллийн “RealClear Politics” сайтын явуулсан олон нийтийн судалгаагаар АН-ын нэр дэвшигч 43.8 хувь, Трамп 40.9 хувийн дэмжлэг хүлээжээ.

Харин улстөрийн жижиг хүчин болох Либериал намын нэр дэвшигч Гари Жонсоныг дэмжигчид 7.3 хувьтай байлаа. Тэрбумтан эрийн дэмжигчид ийн буурах болсон шалтгаан нь сүүлийн үед дуулиан тариад буй “Miss Universe” тэмцээний ялагчийг зүй бус үгээр доромжилсонтой холбоотой аж.

Дэлхий даяар 84 сая орчим хүн үзсэн телевизийн халз мэтгэлцээний дараа Хиллари Клинтоны дэмжигчид Флорида, Невада, Нью Хампшире гэх мужуудад өсчээ. Гэхдээ дэмжигчдийнх нь хувь өссөн гээд ирэх сард болох Ерөнхийлөгчийн сонгуульд ялна гэж ойлговол өрөөсгөл билээ. Ардчилсан нам одоогоор 20 сая орчим хүн амтай, сонгогчдын тоо харьцангуй их буюу өрсөлдөөн өрнөх гол тойрог Флорида муж дахь дэмжигчдийнхээ тоог өсгөх бодлого барьж буй.

Харин ингэхийн тулд тэдэнд ердөө хоёр долоо хоногийн хугацаа л үлдээд байна. Тиймээс 2008 болон 2012 оны Ерөнхийлөгчийн сонгуульд Флорида мужид ялалт байгуулсан  Барак Обама, Иосеф Байден нар энэ долоо хоногт  тус мужид очиж, Хилларигийн сонгуулийн кампанит ажилд оролцох бололтой.

“Miss Universe” тэмцээний ялагчийг Д.Трамп “гахай” хэмээв

Дээр цухас дурьдаад өнгөрсөн “Miss Universe” тэмцээнтэй холбоотой асуудлын энд хөндье. Чухам энэ тэмцээний ялагчийг Доналд Трамп зүй бус үгээр доромжилсон нь илчлэгдсэнээр түүнийг дэмжчигчдийн  тоо буурсан гэж зарим улс төрийн чиглэлээр дагнан бичдэг сайтууд мэдээлж байгаа. Иймээс тус явдлын талаар сонирхуулья.

1996 оны “Miss Universe” наадмын ялагч Венесуэлийн гоо бүсгүй Алисиа Мачадог эрчимтэй жин нэмэх болсныг нь шүүмжлэн, “Мисс тоорой” гэж хочилсныг халз мэтгэлцээний үеэр Хиллари Клинтон сөхсөн байдаг. Клинтон “Трамп бусдыг дорд үзэж, өөрийгөө дөвийлгөдөг зантай. Тэр эмэгтэйчүүдийг элдвээр хэлж, доромжилдог. Тэгсэн хэрнээ өөрөө гоо сайхны тэмцээнийг зохион байгуулдаг.

Трамп Miss Universe тэмцээний ялагч бүсгүйг гахай гэж дуудсан. Түүгээр ч зогсохгүй түүнийг латин америк гаралтай байсан учраас гэрийн үйлчлэгчээ гэж дуудсан баримт бий. Түүнийг гахай гэдэггүй, гэрийн үйлчлэгч ч биш, Алисиа Мачадо гэдэг юм. Алисиа одоо АНУ-ын иргэн болсон учраас энэ удаагийн Ерөнхийлөгчийн сонгуульд саналаа өгнө гэдгийг мэдэж байгаа биз дээ” гэсэн байдаг.

Хиллари Клинтон сонгуулийн кампанит ажилдаа 154 сая ам.доллар зарцуулжээ

Ардчилсан намаас Ерөнхийлөгч­ийн сонгуульд нэр дэвшигч Хиллари Клинтон өнгөрөгч есдүгээр сарын кампанитдаа зарцуулсан нийт хөрөнгийнхөө хэмжээг олон нийтэд зарлалаа. Тодруулбал, 154 сая ам.долларыг тэрбээр зарцуулсан байх бөгөөд энэ дүн нь өнгөрсөн хугацаанд байгаагүй их хэмжээ юм.  Наймдугаар сард Хиллари 143 сая ам.долларыг зарцуулж байсан бол Доналд Трампынх  90 сая ам.доллар байв.

Ерөнхийлөгчийн сонгууль ирэх арваннэгдүгээр сарын 8-нд болох хэдий ч, санал хураалтын өдөр дөхөх тусам нэр дэвшигчдийн зарцуулах хөрөнгийн тоо нэмэгдэх бололтой. Үүнээс гадна есдүгээр сард Хилларид нийтдээ 900 гаруй мянган хүн хандив өргөсөн байна. Үүнийг сурталчилгаа эхэлснээс хойш тооцвол нийтдээ 2.6 сая хүн  мөнгө хандивласан байгаа юм. Нөгөөтэйгүүр,  Трамп есдүгээр сард сонгуулийн сурталчилгаанд зарцуулсан хөрөнгийнхөө талаархи мэдээллийг нийтэд зарлаагүй байна.