Английн нэрт хуульч Сарош Зайваллагийн “Нэр төрийн баталгаа” номын нээлт Санхүү эдийн засгийн их сургуулийн Лекцийн танхимд боллоо. Номын нээлтэд зохиогч С.Зайвалла өөрийн биеэр оролцож, сонирхолтой лекц уншсан байна.

Ноён Сарош Зайвалла нь улс орнуудын Засгийн газартай холбоотой хэрэг маргааныг өмгөөлж, заргаа авдгаараа алдартай нэгэн бөгөөд энэ номдоо шүүх дээр тохиолдсон ялсан болон ялагдсан тухай адал явдлууд, тэр дотроо Монголын нэгэн хэргийг хэрхэн шийдвэрлэхэд дэмжлэг үзүүлж ажилласан тухайгаа бичсэн байна. Тэрбээр П.Цагааны урилгаар Монголд ирж, Эрдэнэт үйлдвэрийн Казакстаны Балхашмысаас авах авлагыг /20 сая ам.доллар/ барагдуулахад чухал үүрэг гүйцэтгэсэн байна.

Нээлтийн арга хэмжээнд их сургуулийн багш нар, хуулийн ангийн оюутнууд, хуульчид урилгаар оролцсон байна. Сургуулиудын номын санд С.Зайвалла “Нэр төрийн баталгаа”, П.Цагаан “Хууль зүйн латин-англи-орос-монгол толь” номоо хандивласан байна.

“Нэр төрийн баталгаа” номыг Интер ном, Аз хур номын дэлгүүрээс худалдаж авч болох бөгөөд esan.mn цахим номын сангаас уншиж болох аж.