2015-2016 оны хичээлийн жилд нийслэлийн төрийн өмчийн 233, төрийн бус өмчийн 399 цэцэрлэгт нийт 91.687 хүүхэд хамрагджээ. Харин энэ жил нийслэлд шинэ болон өргөтгөлийн 31 цэцэрлэгийн барилга ашиглалтад орж байгаа аж.

Тэгвэл 2016-2017 оны хичээлийн жилийн цэцэрлэгийн бүртгэл элсэлтийг хэрхэн зохион байгуулах талаар холбогдох албаны хүмүүс өнөөдөр мэдээлэл хийлээ. Энэ жилийн цэцэрлэгийн бүртгэлийг элсэлтийн тасалбарын тусламжтайгаар явуулах юм байна.

Тодруулбал, цэцэрлэгүүд бүртгүүлэхээр ирсэн хүүхэд бүрт элсэлтийн тасалбар өгөх гэнэ. Үүний дараа наймдугаар сарын 26-нд нэгдсэн журмаар сугалаа явуулахаар болжээ. Хэвлэлийн бага хурлын үеэр өнгөрсөн жил суралцаж байсан хүүхдүүд үргэлжлүүлэн сурах бөгөөд 2014 онд төрсөн хүүхдүүдийг шинээр бүртгэнэ гэдгийг албаныхан онцолсон.