ИЗНН-ын дарга С.Оюун ажлаас чөлөөлөгдөх хүсэлтээ гаргажээ. Түүний хүсэлтийг хэлэлцэхээр ИЗНН-ын Улс төрийн зөвлөл арваннэгдүгээр сарын 20-нд хуралдаж, Үндэсний хорооны хурлаа зарлахаар болжээ. Үндэсний хорооны хурлаа тус намынхан ирэх оны нэгдүгээр сарын 27-нд зарлан хуралдуулах төлөвлөөд байгаа юм. Энэ хурлаар намынхаа Их хурлыг хуралдуулах эсэхээ шийдэх гэнэ.

С.Оюун Дэлхийн усны байгууллагын даргаар томилогдсон учраас намын даргын үүрэгт ажлаасаа чөлөөлөгдөх хүсэлтээ ийнхүү өгчээ. УИХ-ын гишүүн асан С.Оюун 2000 оноос хойш ИЗНН-ын даргаар тасралтгүй 17 жил ажиллаж, УИХ-ын дэд дарга, Гадаад хэргийн сайд, Байгаль орчны сайд гээд өндөр албан тушаалууд хашсан нэгэн юм.

ИЗНН нь дүрэмдээ гурав хүртэл даргатай байхаар заасан. 2015 онд болсон намын Их хурлаараа С.Дэмбэрэл, С.Оюун, Ц.Ганхуяг нарыг ИЗНН-ын даргаар сонгосон. Гэвч, 2016 оны УИХ-ын сонгуулийн өмнө С.Дэмбэрэл Ардчилсан намд элссэн бол С.Оюун чөлөөлөгдөх өргөдлөө өгөөд байна. Тэгэхээр Ц.Ганхуяг намын даргаар дангаараа үлдэх үү, хоёр дарга нэмж тавих уу гэдгийг Их хурлаараа шийдэх аж. 

С.Зориг ахынх нь хэрэг өнгөрсөн зун шүүхээр шийдэгдэж, гурван хүн ял сонсоод байгаа. Тэд үнэхээр түүний ахыг алсан уу, хэн захиалсан, 16 настай хүүхэд хотод ирээд хүн алах уу гээд олон олон хариугүй асуулт энэ хэргийн ард үлдсэн.